Dubaydakı sel fəlakətinin səbəbi nədir? - VİDEO

Birləşmiş Ərəb Əmirliklərində (BƏƏ) hökumət son 75 ilin ən güclü yağışlarının səbəb olduğu daşqınlarla mübarizə aparır.

News24.az xəbər verir ki, güclü leysanlar bazar ertəsi gecədən başlayıb. Bu, nəqliyyatın dayanmasına, uçuşların ləğvinə və məktəblərin bağlanmasına səbəb olub.

BƏƏ hökuməti öz vətəndaşlarına evdə qalmaq və yalnız "həddindən artıq zərurət olduqda" çölə çıxmaq barədə xəbərdarlıq edib.

Bloomberg iddia edib ki, "bulud səpmə" adlanan üsul güclü yağışlara səbəb olub. Bu da öz növbəsində ölkə daxilində dağıdıcı daşqınlara səbəb olub.

(Bulud səpilməsi yağışın miqdarını və növünü dəyişdirmək üçün buludlara müxtəlif kimyəvi maddələr, xüsusilə gümüş yodid səpərək buludlarda baş verən fiziki proseslərə təsir etmək üçün istifadə edilən hava dəyişikliyi üsuludur.)

BƏƏ-nin əsas qəzetlərindən biri olan “National” qəzeti BƏƏ-də üç günlük leysan yağışlarının bulud səpilməsinin səbəb olduğu iddialarını rədd edib. Ancaq bunun, kiçik bir rol oynaya biləcəyini də etiraf edib.

Xatırladaq ki, hökumət su qıtlığı ilə bağlı problemləri həll etmək üçün 2002-ci ildən bəri toxum səpmə əməliyyatları həyata keçirir.

Günel Məlikzadə