Budapeşt bir daha Brüsseli tənqid atəşinə tutub

Budapeşt, 17 aprel, AZƏRTAC

Macarıstanın Baş naziri Viktor Orban Aİ rəhbərliyini siyasi şantajda ittiham edib və bildirib ki, o, bütün əsas layihələri iflasa uğratdığı üçün istefaya getməlidir.

AZƏRTAC xəbər verir ki, Macarıstanın Baş naziri Avropa Komissiyasının rəhbəri Ursula Fon der Lyayenin Budapeştin miqrasiya və anti-gender siyasəti ucbatından Aİ fondlarından pul almayacağını açıq şəkildə bəyan etməsinə məhz belə cavab verib.

O deyib: “Avropa İttifaqında liderlər yaşıl keçid, davamlılıq siyasəti, miqrasiya, sanksiyalar və hərbi siyasət kimi əsas layihələri özləri seçdilər və onların hamısı uğursuz oldu”.

Orbanın fikrincə, Aİ-nin hazırkı rəhbərliyi getməlidir, İttifaqa yeni liderlər lazımdır. Siyasətçi əlavə edib ki, Brüssel qanunun aliliyi və şərtlər mexanizmindən siyasi şantaj aləti kimi istifadə edir.

Vüqar Seyidov

AZƏRTAC-ın xüsusi müxbiri

Budapeşt