Milan vağzalı ən yeni optik illüziyanın köməyi ilə “Milad”ı görür

Bakı, 17 aprel, AZƏRTAC

Fransız küçə rəssamı olan JR demək olar ki, özünün indiyədək yaratdığı ən mürəkkəb italyan illüziyasını təqdim edib. O, Milan şəhərinin Mərkəzi vağzalının qarşısındakı meydanı nəhəng miqyasda müvəqqəti sərgi salonuna çevirib.

“La Nascita” (“Milad”) adlanan kompozisiya Alp dağlarını aşan çoxtəbəqəli ağ-qara təsvirləri ehtiva edir. Bu barədə AZƏRTAC xarici mediaya istinadla xəbər verir.

Rəssam JR Pyaçça Duka Д'Аоста meydanında – vağzalın 50 metrlik fasadının kölgəsindəki geniş ərazidə öz rəsmlərini təqdim edərkən deyib: “Sosial problemlərin olduğu məkanlarda mənim əsərlərim insanları birləşdirməyə yönəlib. Belə bir yerdə çoxlu sayda insan qatara minməyə gəlir. Özlərini sərginin qarşısında tapdıqda, onların arasında birdən-birə tamamilə fərqli bir qarşılıqlı ünsiyyət növü yaranır”.

Milan Dizayn Həftəsi ilə üst-üstə düşən və mayın 1-dək davam edəcək sərginin rəsmləri insanları İtaliyanın şimalında dəmir yolu səyahətinin qızıl dövrünə qaytarır. O, həmçinin diktator Benito Mussolininin 1930-cu illərdə faşist gücünə və qüdrətinə bir abidə kimi açılışından onilliklər əvvəl, Kral III Vittorio Emanuelin dövründə - 1906-cı ildə İtaliya və Fransanı birləşdirən Alp dağından keçən Simplon tunelinin tamamlanmasından qısa müddət sonra simvolik təməl daşının qoyulduğu Milan nəqliyyat mərkəzinə tarixi ab-hava əlavə edib.

Milanın Mərkəzi vağzalının sifarişi ilə hazırlanmış bu kompozisiya tunelin inşa edildiyi dağları xatırladır, kağız təsvirlər şaquli lövhələrə yapışdırılır və onlar stansiyaya baxan çoxqatlı kompozisiya yaratmaq üçün düzülür. JR-nin 2021-ci ildə Florensiyanın Palazzo Strozzi və Romadakı Palazzo Farnesedə əvvəlki instalyasiyalarında olduğu kimi, rəssam təkrarən dəlik effekti yaradır. O, bu dəfə tunel kimi əzəmətli binanı kəsərək incəsənət möcüzəsi yaradıb.

Ancaq Florensiya və Romadakı layihələr binaların fasadlarına yerləşdirilən düz təsvirlərdən ibarət olduğu halda, rəssam JR Milanda dərinlik hissi yaratmağa çalışıb. O, jurnalistlərə müsahibəsində deyib: “İlk dəfədir ki, çoxtəbəqəli belə təsvirlər yaradıram. Mən nadir hallarda böyük binalarla işləyirəm. Həmin stansiyadan necə keçəcəyimi anlamaq üçün mənə bir qədər vaxt lazım oldu”.

JR ümid edir ki, quraşdırma ərazini yeni işıq fonunda göstərəcək. Onun sözlərinə görə, sərgi müvəqqəti və qapalı olsa belə, ziyarətçilər stansiyanı bir daha əvvəlki kimi görməyəcəklər.

JR qeyd edib: “Ətrafda baş verən hadisələrə yeni baxış bucağı insanı həmişə dünyaya yeni prizmadan baxmağa sövq edir. Bu, şəraitdən asılı olmayaraq, mənim hər zaman can atdığım mövzudur”.