Qan Donorları Assosiasiyasının sədri: "Cəmiyyətimdə hemofiliyalı olaraq yaşamaq..."

Hər il aprelin 17-si Ümumdünya Səhiyyə Təşkilatının və Dünya Hemofiliya Federasiyasının təşəbbüsü ilə Ümumdünya Hemofiliya Günü kimi qeyd edilir.

Bu  tarixin seçilməsi Dünya Hemofiliya Federasiyasını yaratmış Frenk Şnaybelin doğum günü ilə əlaqədardır. Onun təsis edilməsinin və qeyd olunmasının məqsədi qanın laxtalanması prosesinin pozulması ilə əlaqədar irsi xəstəlik olan hemofiliyadan əziyyət çəkənlərin hər gün üzləşdiyi problemlərə dünya ictimaiyyətinin, siyasətçilərin və səhiyyə işçilərinin diqqətini cəlb etmək, bu barədə onların məlumatlılığını artırmaqdır. Azərbaycanda 1700-dən çox irsi qan xəstəliyi olan hemofiliyadan əziyyət çəkən insan var. Qeyd edək ki, hemofiliya qanın laxtalanması prossesinin pozulması ilə əlaqəli olan irsi xəstəlikdir. 

 

Həmsöhbətimiz hemofiliyadan əziyyət çəkən, bu xəstəliklə mübarizədə bir çox yerli və beynəlxalq layihələri icra edən Qan Donorları Assosiasiyasının sədri Fuad Əsgərovdur. O Moderator.az-a açıqlamasında  Azərbaycan cəmiyyətinin bu xəstəliklə mübarizədə dünya ölkələrindən çox geridə qaldığını bildirdi:

 "Çünki ölkəmizdə Hemofiliyalı şəxslərlə bərabər digər sağlamlıq məhdudiyyətli insanlar üçün də gündəlik həyat fəliyyətinin yaxşılaşdırılması istiqamətində addımlar atılmır. Hemofiliya ağır fiziki istirablı xəstəlik olmasına baxmayaraq sosial təminatlarının olması səbəbindən gərgin iş qrafiklərində işləmək məcburiyyətində qalırlar. Bu isə öz növbəsində sağlamlıqlarını daim stress və istirab içərisində yaşamaqlarına səbəb olur. Hemofiliyalı olaraq cəmiyyətimizdə yaşamaq bizə çox çətindir. Sosial qayğılar və sağlamlıq imkanlarının məhdud olması bizi sağlam insanlarla bərabər yaşamaq imkanlarından məhrum edir. Mən cəmiyyətimizi hemofiliya ilə mübarizəyə və bərabər imkanlı vətəndaş olaraq fəaliyyətimizə dəstək olmağa çağırıram".