“Bu, daha çox provokasiya xarakterli açıqlamadır”- Zatulinin sülhməramlılarla bağlı dediklərinə REAKSİYA

“Konstantin Zatulin daim ermənipərəst mövqeyi ilə seçilən siyasətçi olub. Həmçinin o, zaman-zaman Ermənistanın işğalçılıq siyasətinə haqq qazandırıb və Azərbaycanın haqq-ədalət işinə daim kölgə salmağa çalışıb”.

Bu sözləri Yenicag.az-a açıqlamasında politoloq Sahil Kərimli deyib.

Analitik Rusiya Dövlət Dumasında MDB işləri üzrə komitə sədrinin birinci müavini Konstantin Zatulinin Qarabağdakı Rusiya sülhməramlıları ilə bağlı səsləndirdiyi fikirləri təhlil edib.
Onun fikrincə, Zatulinin son açıqlaması çox böyük rezonansa səbəb ola bilər.

“Çünki bu açıqlama daha çox provokasiya xarakterli açıqlamadır. Əlbəttə ki, onun sözləri Rusiya ilə Azərbaycan arasında olan isti münasibətlərin korlanması, habelə müttəfiqlik zirvəsinə qalxmış münasibətlərə xələl gətirmək məqsədi daşıyır. Bu gün Rusiya sülhməramlılarının Azərbaycanda olması müvəqqəti xarakter daşıyır ki, biz 10 noyabr üçtərəfli bəyannaməsindən də bunun şahidi oluruq. Bəyanat sübut edir ki, sülhməramlıların Azərbaycan ərazisində 5 il ərzində qalma mandatı var”, – deyə o bildirib.

Onun sözlərinə görə, Azərbaycan öz ərazi bütövlüyünü və suverenliyini tam bərpa etdikdən sonra sülhməramlıların 5 ildən artıq ərazilərimizdə qalmasına ehtiyac yoxdur.
“Bu baxımdan, Zatulin haqlıdır və vaxtı gələndə tərəflər üzərlərinə düşən öhdəlikləri yerinə yetirəcəklər. Həmçinin biz sülhməramlıların Azərbaycan ərazilərində qalmasında mənfi çalar axtarmamalıyıq, çünki Rusiya Azərbaycanın müttəfiqidir. Ona görə ki, müttəfiqlik bəyannaməsinə imza atan hər 2 ölkə bir-birinin ərazi bütövlüyü və suverenliyinə hörmətlə yanaşır və əgər üçüncü qüvvələr tərəfindən təhdid yaranarsa, müttəfiqlər öz öhdəliklərinə uyğun olaraq bir-birilərinə müdafiə etməlidirlər”, – S.Kərimli əlavə edib.

Siyasi təhlilçi xatırladıb ki, son dövrlərdə Rusiya sülhməramlılarının Azərbaycanda qalması məsələsini gündəmə gətirən bəzi dairələr mövcuddur:

“Rəsmi şəkildə də bəyan olunmuşdu ki, sülhməramlılar minatəmizləmə prosesində böyük töhfələr verə bilərlər. Çünki işğal dövründə Azərbaycan ərazilərinə 1 milyondan artıq mina basdırılıb. Minatəmizləmə prosesi isə ağır, uzun sürən və böyük vəsait tələb edən bir prosesdir. Rusiya sülhməramlıları da bu istiqamətdə töhfələr verə bilər.

Qeyd etmək lazımdır ki, əvvəllər ermənipərəst siyasət yürüdən Zatulin bu gün Azərbaycan və Rusiyanın xeyrinə olan bir bəyanat səsləndirir. Əlbəttə ki, bu məsələ yaxın vaxtlarda öz həllini tapacaq və Zatulin kimi siyasətçilərin bu istiqamətdə fikir yürütməsi Bakı və Moskva arasındakı əlaqələrdə korrektlərin edilməsinə vadar etməyəcəkdir”.

Xatırladaq ki, K. Zatulin açıqlamasında bəyan edib ki, ermənilərin Qarabağı tərk etməsindən sonra Rusiya sülhməramlılarının həmin bölgədə olması üçün daha az səbəb var.

Rafi Müslümov