İsrailin İrana qarşı qisas planı müharibəyə başlamayacaq

İsrailin İrana cavabının səbirsizliklə gözlənilən İsraildə dünən gecə keçirilən hərbi kabinet iclası heç bir nəticə verməyib. İsrail rəsmiləri saatlarla davam edən görüşdə İrana qəti cavabın verilməsinə qərar verildiyini, lakin bunun metodu və vaxtı ilə bağlı müzakirələr aparıldığını bildirib. Bəzi hərbi kabinet üzvlərinin İrana dərhal cavab verilməməsi və təkbaşına hərəkət etməməsinin tərəfdarı olduğu qeyd edilib. İsrail ordusunun sözçüsü Daniel Hagari hücum və müdafiə sahəsində bütün variantların masada olduğunu açıqlayıb.

ABŞ və bir çox ölkələr İsrailin çox sərt cavabının İranla birbaşa müharibə təhlükəsi yaradacağından narahatdırlar. Tərəflərə mötədillik çağırışları davam edərkən, ABŞ prezidenti Co Bayden İsrailin baş naziri Netanyahuya ABŞ-ın İrana qarşı əks hücumda iştirak etməyəcəyi ilə bağlı xəbərdarlıq edib. Ağ Evin Milli Təhlükəsizlik sözçüsü Con Kirbi bildirib ki, ABŞ İsrailə özünü müdafiə etməyə kömək etməyə davam edəcək, lakin müharibə istəmir.

İsrail aprelin 1-də İranın Dəməşqdəki konsulluğunun binasına hava hücumu həyata keçirib və hücumda İran İnqilab Keşikçiləri Ordusundan 2-si general olmaqla 7 nəfər həlak olub.

İran aprelin 13-də yüzlərlə kamikadze pilotsuz uçuş aparatı, ballistik və qanadlı raketlərlə İsrailə hücum edib və bəzi hərbi hədəflərin vurulduğunu açıqlayıb. İsrail bildirib ki, hücumların əksəriyyətinin qarşısı hava hücumundan müdafiə sistemləri tərəfindən alınıb, lakin raket cənubdakı hərbi bazaya düşüb.