Tez-tez acmamaq üçünnecə qidalanmalı?

Bəs tez-tez acmamaq üçün necə qidalanmaq lazımdır?

Medicina.az xəbər verir ki, bu suala dietoloq Nafikar Başkan cavab verib.

O, gün boyu balanslı qidalanaraq aclıq hiss etmədən daha az kalori qəbul etmək üçün aşağıdakıları məsləhət görüb:

Günə səhər yeməyi ilə başlasanız, gün ərzində qan şəkərinizin səviyyəsi tarazlaşacaq, maddələr mübadiləniz yavaşlamayacaq, toxluq dövrünüz uzanacaq və gün ərzində lazımsız kalorilər qəbul etməyəcəksiniz. Ona görə də günə səhər yeməyi olmadan başlamayın.

Gündə orta hesabla ən azı 2-2,5 litr su istehlak edin. Yeməkdən əvvəl su istehlakına xüsusi diqqət yetirin. Su mədədə həcm alaraq iştahınızı idarə edəcək, toxluğunuzu uzadacaq və daha az yeməyə səbəb olacaq. Yeməkdən yarım saat əvvəl 1 stəkan su içməyi sınayın.

Darçın həm toxluq hissi verir, həm daha enerjili hiss etdirir, həm də şirniyyata olan ehtiyacı azaldır. Bu məqsədlə meyvələrin üzərinə və ya qatığa darçın əlavə edərək yeyə bilərsiniz. Darçın qan şəkəri səviyyəsini tarazlaşdırmaq qabiliyyəti ilə şirniyyat yemək istəyinizi də azaldacaq.

Qazlı və şəkərli içkilər əvəzinə ayran, mineral su, eləcə də evdə hazırlanmış təzə sıxılmış meyvə şirələri içə bilərsiniz.

Yeməklərin yanında ağ çörək əvəzinə tam taxıllı çörək yeyin. Bu sayədə gün ərzində toxluq müddətinizi uzada bilərsiniz.

Xörəyi sürətli şəkildə yeməyin, çox yaxşı çeynəyin. Toxluq siqnalı beyinə təxminən 20 dəqiqəyə çatır. Tez yeyirsinizsə, toxluq siqnalına qədər masanın üstündəki hər şeyi bitirəcəksiniz. Yeməyi yaxşı çeynəmək və yavaş yemək iştahınızı idarə etməyinizi asanlaşdıracaq.

Fiziki fəaliyyətinizi artırın. Gündəlik 40-50 dəqiqəlik gəzintilər həzm sağlamlığınızı qoruyacaq. Yavaşlayan maddələr mübadiləniz idmanla sürətlənə bilər.

Porsiyanı biraz azaldın. Bu ilk başda çətin gəlirsə, kalorisi az, həcmi çox olan qidalara üstünlük verə bilərsiniz. Porsiyalar azaldıqca həzmsizlik, şişkinlik və mədə problemləri aradan qalxacaq.

Axşam üçün salat və tərəvəz yeməyi kimi yüngül variantlar seçin. Bunu etməklə, gün ərzində istehlak edilən ümumi kaloriləri balanslaşdıra bilərsiniz.

Gün ərzində uzun müddət ac qalmaq ilk fürsətdə daha böyük porsiyalara və kalorisi yüksək olan zərərli qidalara meyil etməyinizə səbəb olacaq. Odur ki, həddən artıq acmağı gözləməyin. Aclıq hiss etdikdə qəlyanaltılar edin. Meyvə qəlyanaltılar üçün sağlam bir alternativdir. Digər tərəfdən, meyvələri tək istehlak etmək əvəzinə onu çox yaxşı zülal qaynağı olan süd və ya qatıq kimi qidalarla birlikdə istehlak etmək qan şəkərinin ani artımının qarşısını alacaq.

Serotonin çatışmazlığı şəkər istəyinə yol açır. Probiotik istehlakı bağırsaqlarda serotonin istehsalını artırır. Serotoninin artırılması şirniyyat yemək istəyini azaltmağa kömək edəcəyi üçün gün ərzində evdə hazırlanan qatıq, kefir və turşu kimi probiotik qidaları istehlak etmək çox vacibdir.

7-8 saatlıq keyfiyyətli yuxu insanın gün ərzində lazımi enerjiyə sahib olmasını təmin edir. Bu yolla orqanizm stressə düşməyəcək və daha çox qida tələb etməyəcək. Az yatmaq enerjimizi aşağı saldığı üçün şirniyyat ehtiyacını da artırır.