“Münaqişənin davam etməsini istəyən dövlətlər var” – Borell

Avropa İttifaqı (Aİ) Sudandakı humanitar böhranın miqyasına diqqət çəkərək münaqişə tərəflərinə təzyiq göstərməklə müharibəni bitirmək üçün səyləri birləşdirməyə çağırıb.

Vətəninfo.az xəbər verir ki, Avropa İttifaqının xarici işlər və təhlükəsizlik siyasəti üzrə xüsusi nümayəndəsi Cozep Borrell Fransanın paytaxtı Parisdə keçirilən “Sudan və onun qonşuları üçün beynəlxalq humanitar konfrans”da çıxış edərək deyib: “Sudan mülki əhalinin köçməsi baxımından dünyada ən böyük böhranın yaşandığı ölkədir. Burada humanitar böhran çox böyükdür. Böhranlar çoxdur, lakin onların heç biri bu qədər təcili deyil. 18 milyon insan aclıqdan ölmək təhlükəsi ilə üz-üzədir. Darfur iki hərbçinin ambisiyaları nəticəsində yaranan dəhşətli humanitar böhranın episentridir.

Beynəlxalq ictimaiyyət humanitar yardımların çatdırılması üçün döyüşən tərəflərə təzyiq göstərməli, digər tərəfdən də atəşkəs üçün səy göstərməlidir. Bu günə qədər müxtəlif təşəbbüslərin vasitəçilikdə müvəffəqiyyət qazanmamasının səbəbi görüşləri təxirə salmaq və danışıqlar imkanının vaxtında olmamasıdır.

Sudan xalqının mümkün qədər tez və tam hərəkət etməyimizə ehtiyacı var. Çox şey deyilib, artıq əməlləri gücləndirməliyik.

Münaqişənin davam etməsini istəyən dövlətlər var. Bəzi ölkələr bir, bəziləri digər tərəfi dəstəkləyir. Təbii ki, nəticə onların hansı tərəfdə olmasından asılı olaraq dəyişir. Buna vasitəçilik demək olmaz. Məsələn, Rusiya da vasitəçilikdə iştirak edir, amma çətin vəziyyətdən istifadə etmək üçün.

Bu konfransın məqsədi rəqabəti və tərəflərə təsir etmək istəyini necə kənara qoya biləcəyimizi müəyyən etməkdir.”