Bakıda bağça və məktəbin qarşısındakı dayanacaq uşaqlara təhlükə yaradır - AÇIQLAMA + FOTO/VİDEO

Bakının Qaradağ rayonu, Lökbatan qəsəbəsi, “Qobu Park” yaşayış massivində bağça və məktəbin arasında yerləşən avtobus dayanacağı sıxlığa səbəb olur və azyaşlıların həyatına təhlükə yaradır.

Bununla bağlı seher.media-a sakinlər məlumat veriblər.

Qeyd olunur ki, 344 saylı uşaq bağçası ilə 20 saylı Laçın məktəbinin düz qarşısında dayanacaq qoyulub. Bir qədər aralıda isə 32 saylı Ağdam məktəbi yerləşir. Həmin ərazi 194 saylı sərnişin avtobusunun sonuncu dayanacağıdır, 140 saylı sərnişin avtobusu isə yolüstü həmin dayanacaqda saxlayır.

Məsələnin problemli tərəfi ondadır ki, məktəb və bağçanın giriş qapısı qarşısında yerləşən bu ərazi geniş olduğundan digər nəqliyyat vasitələri də dönmə əməliyyatı edirlər ki, bu da bağçaya və məktəbə gələn uşaqların, müəllimlərin və valideynlərin həyatını təhlükəyə atır.

Sakinlər həmin dayanacağın yaxınlıqdakı təhlükəsiz əraziyə köçürülməsini xahiş edirlər.