Təcrübəsiz adamlar necə direktor olur? - “Dostluq, qohumluq əlaqələri...”

Son vaxtlar məktəb və kollec direktorlarının fəaliyyətində nöqsan aşkarlanması və bu səbəbdən həmin vəzifəli şəxslərin işdən azad edilməsi halları artıb. Maraqlıdır, görəsən bu vəzifəyə təyin edilən şəxslər niyə etimadı doğrulda bilmir? Təyinat prosesindəki qaydalarda dəyişikliyə ehtiyac varmı? 

Məsələ ilə bağlı Milli Məclisin Elm və təhsil komitəsinin üzvü Ceyhun Məmmədov “Yeni Sabah”a danışıb. Onun sözlərinə görə, bu məsələdə ən əsas problem təcrübəsiz şəxslərin həmin vəzifələrə təyin olunmasıdır: 

“Hesab edirəm ki, kolleclər bir müddət öncə universitetlərin tərkibinə verildi ki, burada fəaliyyət düzgün və daha səmərəli şəkildə qurulsun. Kolleclərin fəaliyyəti üçün dövlət tərəfindən bir sıra mühüm qərarlar verildi, addımlar atıldı. Təəssüflə qeyd etmək lazımdır ki, hazırda bəzi kolleclərin fəaliyyətində heç bir dəyişiklik baş vermədiyini görürük. Hələ də bir sıra kolleclərdə rüşvət mövcuddur, təhsil səviyyəsi aşağıdır. Bu prosesə ən çox təsir edən amillərdən biri kadrların düzgün seçilməməsidir. Təyinat zamanı dostluq, tanışlıq, qohumluq əlaqələri əsas götürülür. Hər zaman qeyd etmişəm ki, idarəçilik təcrübəsi olmayan, heç bir yerdə işləməyən bir şəxsin kollecdə, yaxud məktəbdə rəhbər işləməsi qeyd olunan proseslərə öz mənfi təsirini göstərir. Ona görə mütləq direktorların təyinatında bu məsələ nəzərə alınmalıdır”. 

Deputat təklif edib ki, sözügedən vəzifəyə təyin olunan şəxslərin ən azından direktor müavini olaraq fəaliyyəti olmalı və bu dövr nəzərdən keçirilməlidir:

“İstər orta məktəbdə, istərsə də kollecdə rəhbər işləyəcək şəxsin bu sahədə təcrübəli olması mütləq yoxlanılmalıdır. Ən azından həmin şəxs öncə direktor müavini vəzifəsində normal fəaliyyət göstəribsə, sonrakı dövrdə onu direktor olaraq iş prosesini müşahidə etmək olar. Bu həssas məsələyə mütləq şəkildə diqqət yetirilməlidir. Eyni zamanda kolleclərin fəaliyyətinə nəzarət ciddi formada gücləndirilməlidir. Neqativ hallara qarşı çox sərt tədbirlər həyata keçirilməlidir. Yalnız bu şəkildə həmin sahədəki məqsəd və hədəflərə nail olmaq mümkündür”. 

Aytac Şahin