Son illərdə repititorluq mədəniyyətinin yayılması məktəblərin tədris prosesinə ciddi təsir göstərib. Bir çox şagirdlər, əlavə dərslərə və hazırlıq kurslarına getmək məqsədilə məktəbdən uzaqlaşmağı seçirlər. Bu tendensiyanın yaratdığı problemlər isə məktəbin funksionallığını və şagirdlərin təhsil keyfiyyətini ciddi şəkildə zədələyir.
Birincisi, repititorluq təhsili şagirdlərin məktəbə olan marağını azaldır. Şagirdlər, məktəbdəki dərslərin onlara lazım olduğunu düşünmür və yalnız əlavə dərslərdə iştirak etməyi üstün tuturlar. Bu, məktəbin tədris proqramının zəyifləməsinə səbəb olur. Uşaqların məktəbdəki dərsləri, yalnız bilgi mübadiləsi deyil, həm də sosial inkişaf üçün vacibdir. Əgər şagirdlər məktəbdən uzaqlaşarsa, onların sosial bacarıqları zəifləyir.
İkincisi, bu tendensiya təhsildə bərabərsizliyi artırır. İqtisadi vəziyyəti yaxşı olan ailələrin uşaqları, daha keyfiyyətli repititorluq xidmətlərinə çıxış imkanı əldə edirlər. Bu, məktəbdəki zəif təhsillə birləşərək, şagirdlərin akademik nailiyyətlərində ciddi fərqliliklər yaradır. Nəticədə, məktəbdəki şagirdlər arasında sosial və akademik uçurum yaranır.
Üçüncüsü, repititorluq sisteminin üstünlüyü, məktəbdəki müəllimlərin motivasiyasını azaldır. Müəllimlər, şagirdlərin repititorlarla daha çox zaman keçirdiyini və bunun nəticəsində məktəbdəki dərslərə laqeyd yanaşdığını gördükcə, işlərinə olan motivasiyaları azalır. Bu, dərslərin keyfiyyətini daha da aşağı salır və müəllim-şagird münasibətlərinə ziyan vurur.
Şagirdləri məktəbə qaytarmaq üçün bir sıra tədbirlər görülməlidir. Məktəblərdə müasir və cəlbedici dərslər keçirilməli, şagirdlərin marağını artıracaq fəaliyyətlər təşkil edilməlidir. Müəllimlərin peşəkarlığı artırılmalı, müasir tədris metodları tətbiq edilməlidir. Eyni zamanda, valideynlərə repititorluğun potensial riskləri barədə məlumat verilməli və məktəbə olan etimadlarının artırılması üçün çalışılmalıdır.
Bütün bu faktorlar, şagirdlərin məktəbə qayıtmasını təmin etmək üçün əhəmiyyətlidir. Məktəb, yalnız bilik əldə edilən bir yer deyil, həm də sosial, emosional və şəxsi inkişaf üçün vacib bir mühitdir. Bu mühiti qorumaq və inkişaf etdirmək, cəmiyyətin gələcəyi üçün önəmlidir.
Bəhmən Hüseynli
