“Samsung” şirkəti Cənub-Şərqi Asiyada, həmçinin Avstraliya və Yeni Zelandiyadakı istehsal müəssisələrində bir neçə min işçini ixtisar etmək niyyətindədir.
Marja xəbər verir ki, bu barədə Bloomberg mənbələrə istinadən məlumat yayıb.
Onların fikrincə, ixtisarlar ümumilikdə bu ölkələrdə şirkətin işçi qüvvəsinin təxminən 10%-nə təsir edə bilər.
Nəşrin mənbələri qeyd edib ki, bundan əvvəl Samsung-un Sinqapurdakı bölməsinin əməkdaşları menecerlərlə məxfi görüşə çağırılıb və görüş zamanı onlara qarşıdan gələn ixtisarla bağlı məlumat verilib.
“Samsung” şirkətinin Cənubi Koreyadan kənarda yerləşən bölmələrində təxminən 147 min işçi çalışır ki, bu da Samsung işçilərinin ümumi sayının yarıdan çoxunu təşkil edir.
Bloomberg-in məlumatına görə, şirkətin səhmləri 2024-cü ildə rəqiblərindən süni intellekt (AI) sahəsində geridə qalması səbəbindən 20%-dən çox ucuzlaşıb.
Korporasiyanın süni intellekt texnologiyaları bazarında üzləşdiyi çətinliklər fonunda Samsung bu yaxınlarda Hindistanda və bəzi Latın Amerikası ölkələrində iş yerlərinin təxminən 10%-ni ixtisar edib.
Sentyabrın 23-də Reuters xəbər verib ki, Samsung Vyetnamda OLED displey zavodunun tikintisinə 1,8 milyard dollar sərmayə yatırmağı planlaşdırır. Bildirilib ki, istehsal ölkənin şimalında mövcud Samsung zavodunun yaxınlığında yerləşəcək. Agentliyin məlumatına görə, şirkət indiyədək Vyetnamda altı fabrik və tədqiqat və inkişaf mərkəzi yaradıb. Cənubi Koreya korporasiyasının Vyetnama ümumi investisiyası 22,4 milyard dollara çatıb.
