Ermənistanın siyasi və hərbi rəhbərliyi Azərbaycanla sülh danışıqlarına gedir, digər tərəfdən isə orduya xarici hərbi kursantları cəlb edir...
Tezadlar.az bildirir ki, Milli Məclisin deputatı Qaya Məmmədov oktyabrın 1-də Bakıda keçirilən Beynəlxalq Münasibətlərin Təhlili Mərkəzində keçirilən “Azərbaycan Prezidenti İlham Əliyevin Milli Məclisdə çıxışının müzakirəsi: müstəqil və prinsipial xarici siyasət” tədbirində çıxışı zamanı bu narahatlığı ifadə edib... Məmmədovun sözlərinə görə, dövlət başçsının parlamentdəki çıxışında Azərbaycanın təhlükəsizlik məsələsinə diqqətə yetirməsi təsadüfi deyil: "Ermənistanın Vətən müharibəsindən sonra hərbi xərclərini artırması ciddi narahatlıq doğurur. 2020-ci ildə müharibə zamanı Ermənistanın hərbi xərcləri 600 milyon dollar olub. Sonrakı illərdə bu rəqəm 1.4 milyard və 1.7 milyard dollara qədər artırılıb. Açıq görünür ki, Ermənistan hərbi büdcəsini müharibədən sonra ciddi şəkildə artırdı. Son üç ildə artırılmış hissə 3 milyard dollara yaxındır. Bu, reallığın ancaq bir hissəsini əks etdirir. Çünki Ermənistan böyük atəş gücünə malik silahlar, hava hücumundan müdafiə sistemləri alır. Əsas tərəfdaşları Fransa və Hindistandır. Ermənistan silahlı qüvvələrinin baş qərargahında orduya xarici hərbi kursantların cəlb olunması ciddi narahatlıq doğurur".
Q.Məmmədov bildirib ki, Azərbaycanın hərbi büdcəsi Ermənistanınkından dəfələrlə çoxdur: "Lakin Ermənistanın təcavüzkar keçmişi, revanşist meyilləri var. Bu dövlət nə zaman özündə hərbi üstünlük hiss etsə, Azərbaycana qarşı təxribatlar törədir, işğal siyasəti yürüdür. Ona görə də bu məqamları nəzərə aldıqda ümumi narahatlıq anlaşılandır. Prezident İlham Əliyev də çıxışında qeyd etdi ki, büdcə layihəsi Milli Məclisə təqdim olunacaq və burada təhlükəsizlik, hərbi xərclərin artırılması məqamları da əks olunacaq".
Deputat vurğulayıb ki, Azərbaycanda XVIII əsrdə ən çox məscid İrəvan quberniyasında olub: "Azərbaycanlılar İrəvanda və Qərbi Azərbaycanda təkcə yaşamayıblar, orada həm də böyük mədəni irs qoyublar. Ona görə də Qərbi azərbaycanlıların bu torpaqlara qayıdışı insan haqlarının ən vacib prinsiplərindən biri kimi diqqətdə saxlanılır. Qərbi Azərbaycan İcması 1989-cu ildən fəaliyyət göstərir və indi də bu istiqamətdə peşəkar səviyyədə fəaliyyət ortaya qoyur".
Belə bir məqamda Ermənistanın siyasi və ya hərbi rəhbərliyinin sülh səmimiyyətinə necə inanasan???
Y.Məmmədli
