OPEC+ sazişində iştirak edən ölkələr daha iki ay - oktyabrdan dekabr ayına qədər neft hasilatını könüllü olaraq gündəlik 2,2 milyon barel barrel azaltmağa davam edəcəklər. Bundan əvvəl alyans ölkələri oktyabr ayından hasilatın mərhələli şəkildə bərpası barədə razılığa gəlmişdilər.
2024-cü ilin birinci rübündən etibarən Rusiya və Səudiyyə Ərəbistanı da daxil olmaqla səkkiz OPEC+ ölkəsi könüllü olaraq hasilatı gündəlik 2,2 milyon barel azaldır. Oktyabr ayından bu ölkələr 2025-ci ilin dekabrına qədər bu hasilat həcmini tədricən bərpa etməyə başlamalı idi. Eyni zamanda, OPEC+ hasilatı bərpa etmək qərarına bazar şəraitindən asılı olaraq yenidən baxılacağını qeyd etmişdi.
OPEC-in saytında yerləşdirilən cədvələ əsasən, oktyabrda hasilatın ümumi artımı gündəlik 180 min barel təşkil etməli idi.
Lakin alyans neft hasilatının bərpasını iki ay - dekabr ayına qədər təxirə salmaq qərarına gəlib. Beləliklə, OPEC+ ölkələri hasilatı gündəlik 2,2 milyon barel azaltmağa davam edir.
Rusiya Federasiyası Baş nazirinin müavini Aleksandr Novak hasilatın artırılmasının təxirə salınması qərarının bazarın vəziyyətini təhlil etdikdən sonra verildiyini bildirib. Onun sözlərinə görə, mövcud vəziyyət bunu etməyə imkan vermir. Rusiya, bazar vəziyyəti tələb edərsə, OPEC+ sazişinin 2025-ci ildən sonraya da uzadılmasını istisna etmir.
