Qazaxıstan və Mərakeş viza tələblərindən azad edilməsi haqqında saziş imzalayıb.
BMT Baş Assambleyasının 79-cu sessiyası çərçivəsində Qazaxıstan Baş nazirinin müavini - xarici işlər naziri Murat Nurtileu Mərakeş Krallığının xarici işlər, Afrika əməkdaşlığı və xaricdəki mərakeşlilər naziri Nasser Burita ilə ikitərəfli görüş keçirib.
Nazirlər siyasi, ticarət-iqtisadi, investisiya və mədəni-humanitar sahələrdə ikitərəfli münasibətlərin hazırkı vəziyyətini və perspektivlərini müzakirə ediblər.
“Danışıqlardan sonra tərəflər Qazaxıstan Respublikası hökuməti ilə Mərakeş Krallığı hökuməti arasında milli/vətəndaş pasportlarının sahiblərinin viza tələblərindən azad edilməsi haqqında saziş imzalayıblar”, - məlumatda deyilir.
Bu saziş iki ölkə vətəndaşlarının səyahətini asanlaşdırmaq məqsədi daşıyır və ikitərəfli münasibətlərin daha da möhkəmlənməsinə töhfə verir.
Müqaviləyə əsasən, Qazaxıstan və Mərakeş vətəndaşları etibarlı milli/vətəndaş pasportları əsasında hər iki ölkənin ərazisinə giriş, çıxış, tranzit və müvəqqəti qalma üçün viza tələblərindən azad edilir. Hər bir qalma, giriş tarixindən etibarən 180 gün ərzində 30 təqvim günündən çox olmamalıdır.
