Dünyaca məşhur dərman şirkəti "AstraZeneca", Qazaxıstanda elmi tədqiqatlar və dərman istehsalına 8 milyard təngə (təxminən 17 milyon ABŞ dolları) sərmayə qoyacaq. Şirkət Almatıdakı yerli fabrikinə, xroniki böyrək xəstəlikləri, ürək çatışmazlığı və 2-ci tip şəkər xəstəliyi üçün innovativ dərmanlar istehsal edəcək.
Fins.az xəbər verir ki, bu layihə, Qazaxıstan hökumətinin 2020-2025-ci illər üçün təsdiq etdiyi dərman və tibb sənayesinin inkişafına dair kompleks plan çərçivəsində həyata keçirilir. Plan çərçivəsində çoxmillətli şirkətlərin istehsalatını Qazaxıstanda yerli hala gətirməsi məqsəd qoyulub. Bu addım, ölkəyə xarici sərmayələri cəlb etmək, texnologiya transferini təmin etmək və daxili dərman istehsalını artırmaq məqsədini güdür.
Şirkət Qazaxıstanda beş yeni dərmanın istehsalını planlaşdırır. İlk mərhələdə dapagliflozin adlı dərmanın istehsalı həyata keçiriləcək. "AstraZeneca" 2025-ci ildən etibarən ilk partiyanı təqdim etməyi hədəfləyir. Ümumilikdə, sərmayələrin 7 milyard təngədən çox olacağı gözlənilir.
Şirkət həmçinin Qazaxıstanda klinik tədqiqatlar keçirəcək. Bu tədqiqatlar şəkər xəstəliyi, ürək çatışmazlığı və xroniki böyrək xəstəliklərinin müalicəsi üzrə real klinik praktikaları araşdıracaq. Təxminən 1 milyon dollar sərmayə qoyulacaq tədqiqatlar Qazaxıstanı qlobal klinik tədqiqatlar xəritəsində tanıdacaq.
"AstraZeneca" həmçinin Uralsk və Almatıda iki endoskopik diaqnostika mərkəzinin açılmasına dəstək olub. Bu mərkəzlərdə diaqnostika xidmətləri xəstələr üçün pulsuz olacaq və erkən mərhələdə xərçəng xəstəliklərinin aşkar edilməsini təmin edəcək.
Şirkət, Qazaxıstanda səhiyyə sisteminin inkişafına mühüm töhfələr verəcəyini və tibbi xidmətlərin keyfiyyətini artıracağını ümid edir.
