1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Rusiya Xarici İşlər Nazirliyinin sözçüsü Mariya Zaxarova bildirib ki, Moskva Ukrayna ilə bağlı sülh sammitlərində iştirak etmək niyyətində deyil.
Oxu.Az bu barədə RİA Novosti-yə istinadən xəbər verir.
Bununla da, o, Volodimir Zelenskinin noyabrda ikinci sülh sammiti keçirmək və Rusiyanı dəvət etmək niyyəti ilə bağlı bəyanatını şərh edib.
"Rusiya nümayəndələri "Bürgenştok prosesi" çərçivəsində heç bir görüşdə iştirak etməyiblər və iştirak etmək niyyətində deyillər", - deyə Zaxarova bildirib.
O qeyd edib ki, ikinci sammit də eyni məqsəd güdür - münaqişənin həlli üçün alternativsiz əsas kimi tamamilə qeyri-mümkün olan "Zelenski formulu"nu irəli sürmək, dünya əksəriyyətinin dəstəyinə nail olmaq və onun adından Rusiyaya bir təklif təqdim etmək.
"Təslim olmaq ultimatumu verən belə zirvələrdə biz iştirak etmirik", - o vurğulayıb.
Zaxarovanın sözlərinə görə, Moskva böhranın siyasi və diplomatik həllindən əl çəkmir və yerdəki vəziyyəti, yaranan geosiyasi reallıqları nəzərə alan həqiqətən ciddi təklifləri müzakirə etməyə hazırdır.
"Rusiya olmadan və onun maraqlarını nəzərə almadan ədalətli və davamlı nizamlanmaya nail olmaq mümkün deyil", - diplomat bəyan edib.
