ABŞ-də həkimin etdiyi səhv ölümlə nəticələnib.
Yenicag.az xəbər verir ki, Alabama ştatından olan 70 yaşlı Uilyam Bryan Floridada tətildə olarkən qəfil qarın ağrısı hiss edib və həyat yoldaşı ilə birlikdə “Ascension Sacred Heart Emerald Coast” xəstəxanasına yerləşdirilib. Həkimlər Brayanın dalağında problem olduğunu düşünərək təcili əməliyyat etməyə qərar veriblər.
Əməliyyat zamanı həkim böyük səhv edib. O, dalağı kəsib götürərkən təsadüfən Brayanın qaraciyərini çıxarıb. Bu ciddi səhv həddindən artıq qan itkisi və Brayanın əməliyyat masasında ölümü ilə nəticələnib.
Daha acınacaqlısı isə cərrahın çıxardığı orqanı “dalaq”la səhv salması və səhvini yalnız Brayan öləndən sonra başa düşməsi olub. Cərrah Brayanın həyat yoldaşına bildirib ki, qaraciyər və dalaq bədənin müxtəlif yerlərində yerləşsə də və ölçüləri tamamilə fərqli olsa da, dalağın yerdəyişməsi olub.
Brayanın həyat yoldaşı Beverli həm məhkəməyə müraciət etmək, həm də cinayət işi açmaq istəyir. Onun məqsədi bu cərrahın digər xəstələrə zərər verməsinin qarşısını almaqdır.
Xəstəxana hadisəni araşdırdıqlarını açıqlayıb, lakin məxfilik səbəbi ilə təfərrüatları açıqlamayıb. Əməliyyat zamanı Bryanın dalağında kiçik bir kist tapılıb və bu, ehtimal ki, ilkin ağrının səbəbi olub.
İsmayıl Bakuvi
