Paralimpiyaçılarımız da “Paris - 2024” də ölkəmizi uğurla təmsil edirlər. “Paris-2024” Yay Paralimpiya Oyunlarının rəsmi açılış mərasimi avqustun 28-də baş tutub. İdmançıların paradında Azərbaycan bayrağını parataekvondoçu İmaməddin Xəlilov və paraatlet Lamiyə Vəliyeva dalğalandırıblar. Qeyd edək ki, Azərbaycan Paris Paralimpiadasında 7 növdə 19 idmançı ilə təmsil olunur.
Bütün Azərbaycanı sevindirən müjdə
Sentyabrın 3-də “Paris-2024” Yay Paralimpiya Oyunlarından ölkəmizə daha bir xoş xəbər gəldi. Azərbaycan paraatleti Lamiyə Vəliyeva “Paris-2024” Yay Paralimpiya Oyunlarında qızıl medal qazanıb. T13 kateqoriyasında çıxış edən idmançı buna 100 metr məsafəni 11,76 saniyəyə qət edərək nail olub. O, sentyabrın 5-də eyni kateqoriya üzrə 400 metr məsafəyə qaçışda da qüvvəsini sınayacaq.
Qazandığı qələbə ilə “Tokio-2020” Yay Paralimpiya Oyunlarının qızıl və gümüş mükafatçısı yeni dünya rekordunu müəyyənləşdirib. Onu da qeyd edək ki, hazırda Azərbaycanın aktivində 3 qızıl, 1 gümüş və 1 bürünc medal var.
“Paris-2024” Yay Paralimpiya Oyunlarında paraatlet Lamiyə Vəliyevanın çıxışı ölkəmizdə böyük həyacanla izlənilib və qələbə sorağı bütün Azərbaycanı sevindirib. Hətta bu qələbəni sevinc göz yaşları ilə qarşılayanlar da çox olub. O cümlədən Azərbaycanın Birinci vitse-prezidenti Mehriban Əliyeva Azərbaycan paraatleti Lamiyə Vəliyevanın “Paris-2024” Yay Paralimpiya Oyunlarında qızıl medal qazanması ilə bağlı paylaşım edib. “Ura! Növbəti qələbəmiz! Dördqat dünya çempionu Lamiyə Vəliyeva “Paris-2024” Yay Paralimpiya Oyunlarında qızıl medal qazandı! İdmançımızı səmimi-qəlbdən təbrik edirəm! Azərbaycan azarkeşlərinə bəxş etdikləri sevincə görə bütün qaliblərə təşəkkürümü bildirirəm!”, - deyə Birinci vitse-prezident paylaşımında vurğulayıb.
Qeyd edək ki, Mehriban xanım Əliyevanın idmançılarımızın Olimpiadada qələbələr qazanmaları münasibətilə sosial şəbəkə hesabında paylaşımlar etməsi gözəl bir ənənəyə çevrilib. Bu paylaşımlar Birinci vitse-prezidentin mötəbər idman yarışlarında idmançılarımızın qazandıqları qələbələrə necə dərin həssaslıqla yanaşdığını təcəssüm etdirir. Təbii ki, belə münasibət idmançılarımıza əlavə stimul verir və onları daha inamla mübarizə aparmağa ruhlandırır.
Vətənə həsr olunan qələbə
Azərbaycan gənclərini fərqləndirən əsas mənəvi keyfiyyətlərdən biri onların yüksək dərəcədə vətənpərvər olmalağıdır. Onlar bunu 44 günlük Vətən müharibəsində bütün dünyaya nümayiş etdirdilər. Eyni zamanda, gənclərimiz ölkədə yaradılan şəraitdən, Prezident İlham Əliyevin və Birinci vitse-prezident Mehriban Əliyevanın diqqət və qayğısından bəhrələnməklə təhsildə, elmdə, istehsalatda, o cümlədən də idman sahəsində nailiyyətlər qazanmağa çalışırlar. Paralimpiyaçılarımız da belə vətənpərvər gənclərimizdəndirlər. Paralimpiyaçılarımız həssas təbəqələri təmsil etsələr də, bu, onların qələbə, Vətənə başucalığı gətirmək əzmlərini arxa plana keçirmir. “Paris - 2024”-də layiqli çıxışları ilə fəxri kürsünün ən yüksək pilləsinə qalxan paralimpiyaçılarımız təsdiqlədilər ki, onlar da eyni dərəcədə vətənpərvərdirlər, eyni dərəcədə cəsur və bacarıqlıdırlar.
“Bu qızıl medal mənim və bütün komandamızın əziyyətinin bəhrəsidir”. Bu sözləri “Paris-2024” Yay Paralimpiya Oyunlarında qızıl medal qazanan Azərbaycan paraatleti Lamiyə Vəliyeva deyib. İdmançı medalını Azərbaycan xalqına həsr etdiyini bildirərək deyib: “Çox sevindirici haldır ki, dünya rekordunu yeniləyərək Paralimpiya çempionu oldum. Məşqlərim bu yarışdan əvvəl çox da yaxşı davam etmirdi. Elə hiss edirdim ki, əvvəlki kimi deyiləm. Amma dünənki qələbə sayəsində bir daha şahid oldum ki, əziyyət yerdə qalmır”.
O, idmana və Paralimpiyaya göstərdikləri diqqətə görə Prezident İlham Əliyevə və Birinci vitse-prezident Mehriban Əliyevaya minnətdarlığını bildirib.
MÜBARİZ
