Cengiz Holdinq, Külək Elektrik Stansiyası layihəsi üçün Almaniyanın ikinci ən böyük bankı olan DZ Bank-dan 20 milyon dollar yaşıl maliyyə vəsaiti alıb. Şirkətdən verilən açıqlamaya görə, gələn il tamamlanacaq layihədə istifadə edilən turbinlərin qanadları Türkiyənin ən böyüyü olacaq.
Hafta.az-ın yazdığına görə, Türkiyənin yerli və bərpa olunan enerji təchizatını artırmaq məqsədilə investisiyalarını davam etdirən Cengiz Holdinq-in qrup şirkəti Cengiz Enerji tərəfindən istifadə ediləcək kreditlə Çərkeş Külək Elektrik Stansiyasına ümumi quraşdırılmış gücü 32,6 meqavat olan külək turbinləri əlavə olunacaq.
Yaşıl kreditlərdən maliyyələşdiriləcək güc artımı layihəsi ilə Çərkeş Külək Elektrik Stansiyasının quraşdırılmış gücü 32,6 meqavat artaraq 82,6 meqavata çatdırılacaq. Hər birinin quraşdırılmış gücü 7,2 meqavat olan külək turbinlərindən ibarət olacaq elektrik stansiyası 183 metr rotor diametri və 90 metr qanad uzunluğu ilə Türkiyənin bu sahədə ən böyüyü olacaq. Rekord qanad uzunluğuna malik tək bir turbində maksimum enerji istehsalına nail olmağı hədəfləyən layihə bu xüsusiyyəti ilə səmərəli, davamlı və ekoloji cəhətdən təmiz layihələrə nümunə göstərəcək. Hər il təxminən 54 min ton karbon qazı emissiyasının qarşısını alacaq layihənin 2025-ci ilin ikinci yarısında tamamlanması planlaşdırılır.
Bəyanatda fikirləri yer alan Cengiz Holdinq İdarə Heyətinin müşaviri Arzu Özgiray yaşıl kreditin ətraf mühitə təsir, davamlılıq baxımından müəyyən meyarlara və öhdəliklərə cavab verən şirkətlərə verildiyini bildirib və əlavə edib: "Dünyanın və Türkiyənin keçdiyi böyük transformasiya prosesində və sıfır karbon səyahətində həm sənayemizi, həm də cəmiyyətimizi idarə etmək istəyirik. Layihəmiz üçün mühüm rol oynayacaq yaşıl kredit müqaviləsi imzalamaqdan çox məmnunuq".
