Bakıda xalası oğlunu qətlə yetirməkdə təqsirləndirilən Yusif İsmayılovun cinayət işi üzrə məhkəmə istintaqı yekunlaşıb.
APA xəbər verir ki, bu gün Bakı Ağır Cinayətlər Məhkəməsində hakim Fəxri Məmmədovun sədrliyi ilə keçirilən prosesdə prokuror çıxış edərək təqsirləndirilən şəxsin 18 il müddətinə azadlıqdan məhrum olunmasını istəyib.
Yusif İsmayılovun vəkili müdafiə çıxışı üçün vaxt məhkəmədən vaxt istəyib.
Proses sentyabrın 10-da davam etdiriləcək.
Qeyd edək ki, hadisə bu il yanvarın 13-də saat 22 radələrində paytaxtın Səbail rayonu ərazisində baş verib.
Araşdırmalarla 1993-cü il təvəllüdlü Yusif İsmayılovun Səbail rayonu, Salyan şossesi 15 ünvanında aralarında yaranmış mübahisə zamanı xalası oğlu Etibar Fətəliyevə bıçaqla xəsarət yetirərək qəsdən öldürməsinə əsaslı şübhələr müəyyən edilib.
Faktla bağlı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb, Yusif İsmayılov polis əməkdaşları tərəfindən saxlanılaraq istintaqa təhvil verilib və prokurorluğun qərarı ilə iş üzrə şübhəli şəxs qismində tutulub.
1995-ci il təvəllüdlü Fətəliyev Etibar Bəxtiyar oğlu bıçaqlanmış vəziyyətdə 3 saylı Təcili Tibbi Yardım stansiyasına gedib. O, təcili yardım avtomobili ilə xəstəxanaya aparılarkən qanaxmadan yolda dünyasını dəyişib.
Qətlə yetirilən Etibar Fətəliyev fitnes üzrə idmançı olub.
Emin Şirvanzadə
