Qərb ölkələri tərəfindən sanksiyaya məruz qalan bəzi rusiyalı oliqarxların övladları ABŞ Müdafiə Nazirliyinə (Pentaqon) bağlı şirkətdə çalışırlar.
Hafta.az-ın “Forbes” jurnalına istinadən yazdığına görə, rusiyalı iş adamları Petr Aven və Vadim Moşkoviçin oğulları Co Lonsdeyl tərəfindən idarə olunan ABŞ-da yerləşən 8VC adlı vençur kapitalı fondunda çalışırlar. Bu fond ABŞ Müdafiə Nazirliyi və NATO üçün layihələr həyata keçirən şirkətlərə sərmayə qoyur.
2022-ci ildə Petr Avenin oğlu Denis Aven 8VC-nin investisiya komandasına qoşulub. Petr Aven 4,3 milyard dollar sərvəti olan rus bankir kimi tanınır və Qərb dövlətlərinin sanksiyalarına məruz qalıb.
Vadim Moşkoviçin oğlu Cek Moşkoviç 2018-ci ildə 8VC-yə qoşulub. Vadim Moşkoviç Rusiyanın aparıcı kənd təsərrüfatı şirkətlərindən olan “Rusaqro”nun təsisçisidir və Rusiyanın Ukraynaya qarşı müharibəyə başlamasından sonra Avropa İttifaqı, Böyük Britaniya və bəzi digər ölkələr tərəfindən sanksiya siyahısına salınıb.
8VC-nin qurucusu Co Lonsdeyl mövzu ilə bağlı verdiyi açıqlamada 8VC-nin heç vaxt bu insanların atalarından və ya dostlarından maliyyə almadığını bildirib. Lonsdeyl Cek Moşkoviçi "ulduz", Denis Aveni isə "istedadlı" adlandırıb. O, həmçinin vurğulayıb ki, şirkət qanunlara ciddi əməl edir və heç bir qanun pozuntusuna yol verməyib.
Bu inkişaf ABŞ-ın Milli Əks Kəşfiyyat və Təhlükəsizlik Mərkəzinin (NCSC) Silikon Vadisində fəaliyyət göstərən startap şirkətləri xarici investorların ABŞ-ın milli təhlükəsizliyini zərbə altına qoya biləcək məxfi məlumatlara çıxış qazanma riski barədə xəbərdar etməsindən sonra gündəmə gəlib.
