Azərbaycan BRICS-ə tamhüquqlu üzvlük istəyir

Azərbaycan BRICS-in tamhüquqlu üzvü olmaq istəyir. Bunu iyulun 10-da VI çağırış parlamentinin sədri Sahibə Qafarova BRICS ölkələrinin X Parlament Forumunun Sankt-Peterburqda keçirilən plenar iclasındakı çıxışında deyib. Xəbəri TASS agentliyi yayıb. “Azərbaycan xarici siyasətində dialoqu, əməkdaşlığı və həmrəyliyi təşviq edir. Bu, ikitərəfli münasibətlərə və beynəlxalq platformalar çərçivəsində fəaliyyətə aiddir. Xüsusilə bu, BRICS ilə əməkdaşlığa aiddir. Azərbaycan artıq BRICS-ə qoşulmaq arzusunu ifadə edib”, – S.Qafarova bildirib. Onun sözlərinə görə, parlamentlər səviyyəsində əməkdaşlığın inkişafı bu məqsədə nail olmağa kömək edəcək. İyulun 3-də Şanxay Əməkdaşlıq Təşkilatının (ŞƏT) Astanada keçirilən zirvə toplantısı çərçivəsində Azərbaycanla Çin arasında strateji tərəfdaşlığın qurulması haqqında birgə bəyannamə qəbul olunub. Bəyannamədə deyilir ki, Azərbaycan BRICS-ə daxil olmaq arzusunu ifadə edir, Çin BRICS əməkdaşlığında Azərbaycanın iştirakını alqışlayır. BRICS 2006-cı ildə yaranıb. 2024-cü ilə qədər beş üzvü var idi – Braziliya, Rusiya, Hindistan, Çin, Cənubi Afrika Respublikası. Bu il isə təşkilata Birləşmiş Ərəb Əmirlikləri, İran, Efiopiya və Misir də qoşulub. AzadlıqRadiosu

• Azərbaycan
• Parlament
• Brics
• Sahibə Qafarova
• Tamhüquqlu Üzvlük