Beynəlxalq Cinayət Məhkəməsinin (BCM) prokuroru Kərim Xan ibtidai istintaq kollegiyasına müraciət edərək, İsrailin Baş naziri Benyamin Netanyahunun və müdafiə naziri Yoav Qalantın həbsinə order verilməsini tələb edib. Yeniavaz.com CNN-ə istinadla xəbər verir ki, bu barədə BCM prokuroru öz bəyanatında bildirib. Sənəddə qeyd edilib ki, prokurorların toplanmış sübutlar əsasında onların hər ikisinin 8 oktyabr 2023-cü ildən bəri Fələstin ərazisində (Qəzza zolağı) törədilmiş hərbi cinayətlərə və insanlığa qarşı cinayətlərə görə məsuliyyət daşıdığına inanmaq üçün ciddi əsasları var. BCM həmçinin HƏMAS-ın üç liderinin - HƏMAS-ın Qəzza zolağındakı lideri Yəhya Sinvarın, hərəkatın hərbi qanadının komandiri Məhəmməd əd-Deyfin və HƏMAS Siyasi Bürosunun rəhbəri İsmayıl Haniyənin həbsinə order verilməsini tələb edib.