Bakı, 15 may, AZƏRTAC
Əmək və Əhalinin Sosial Müdafiəsi Nazirliyinin (ƏƏSMN) 18 yaşınadək əlilliyi müəyyən edilmiş şəxslər üçün sosial xidmət müəssisələrində hazırda 342 uşaq daimi dövlət himayəsində yaşayır. Onlardan 109-u qız, 233-ü oğlandır.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, Heydər Əliyev Fondunun “Uşaq evləri və internat məktəblərinin inkişafı” proqramı çərçivəsində həmin sosial xidmət müəssisələrində uşaqların normal yaşayışı və səmərəli reabilitasiya tədbirlərinə cəlb edilmələri üçün müasir tələblərə uyğun şərait yaradılıb.
Həmin müəssisələrdə əlilliyi olan uşaqlara müəyyən edilmiş rejimə və fərdi iş planına uyğun xidmətlər göstərilir, onların abilitasiyası və reabilitasiyası həyata keçirilir. Uşaqların yaşı və sağlamlıq imkanları nəzərə alınaraq ilkin biliklərə və peşə bacarıqlarına yiyələnmələri, fiziki tərbiyəsi və sair istiqamətlərdə də işlər aparılır.
Qeyd edək ki, nazirliyin tabeliyindəki Sosial Xidmətlər Agentliyinin 1 saylı sosial xidmət müəssisəsi Bakının Mərdəkan qəsəbəsində, 2 saylı sosial xidmət müəssisəsi isə Abşeron rayonunun Saray qəsəbəsində yerləşir.
