Əfqanıstanda leysan yağışlardan sonra baş verən sel fəlakətindən sonra Ümumdünya Ərzaq Proqramı (ÜƏP) humanitar yardım maşınlarının bölgəyə daxil olmaqda çətinlik çəkdiyini açıqlayıb.
"Cebhe.info" xəbər verir ki, Əfqanıstanın Bağlan bölgəsində baş verən sel fəlakətində mülki şəxslərə yardım üçün mübarizə davam edir. Ümumdünya Ərzaq Proqramının mövzu ilə bağlı verdiyi açıqlamada “Əfqanıstanın Bağlan bölgəsində təsirə məruz qalan ərazilərin əksəriyyəti yük maşınları üçün əlçatmazdır. ÜƏP hər şeyini itirmiş sağ qalanlara qida çatdırmaq üçün hər alternativə əl atmalı oldu" deyilir.
Xatırladaq ki, Ümumdünya Ərzaq Proqramı ötən gün daşqınlarda 300 nəfərin həyatını itirdiyini açıqlamışdı. UNICEF-dən verilən açıqlamada isə itkilərin 240 olduğu, həyatını itirənlər arasında 51 uşağın olduğu bildirilib. Açıqlamada “Əfqanıstanın şimal-şərqində baş verən sel fəlakəti nəticəsində 51-i uşaq olmaqla ən azı 240 nəfərin həyatını itirdiyi, çox sayda insanın isə yaralandığı bildirilib. Əlavə hesabatlar əldə olunduqca rəqəmlərin artacağı gözlənilir. Ən çox itkilərin leysan yağışların təqribən 3000 evi dağıtdığı, əkin sahələrinə ziyan vurduğu, mal-qaranın sürükləndiyi, məktəblərin bağlandığı və sağlamlıq mərkəzlərinin zədələndiyi Bağlan vilayətində qeydə alınıb. İlkin hesablamalara görə, Taxar və Bədəxşan əyalətləri də zərər çəkib, ən azı 300 evə ziyan dəyib”,- deyə bildirilir.
Digər tərəfdən, Əfqanıstan Qızıl Aypara Cəmiyyətinin bölgədəki seldən zərər çəkmiş ailələrə kömək etmək üçün işlərini davam etdirdiyini ifadə etdi.
