Nazirlik yanında İctimai şura 2023-cü il üzrə ən fəal İctimai şura seçilib
Bakı, 24 aprel, AZƏRTAC
Əmək və Əhalinin Sosial Müdafiəsi Nazirliyində (ƏƏSMN) bir qrup QHT nümayəndəsi ilə görüş olub. Görüşdə nazirlikdə ictimai iştirakçılığın təmin olunması sahəsində görülən işlərdən bəhs olunub.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, “İnformasiya və Sosial Təşəbbüslərə Dəstək” İctimai Birliyinin sədri Cəsarət Hüseynzadə vətəndaş cəmiyyəti institutları ilə dövlət orqanlarının əməkdaşlığının əhəmiyyətini vurğulayıb.
O, Əmək və Əhalinin Sosial Müdafiəsi Nazirliyinin vətəndaş cəmiyyəti institutları ilə əməkdaşlıq təcrübəsinin təqdirəlayiq olduğunu bildirib.
Qeyd olunub ki, nazirlik ictimai iştirakçılığın təmin edilməsi sahəsində uğurlu fəaliyyətinə və İctimai şuraların vahid onlayn platforması olan ictimaishura.az saytı ilə fəal əməkdaşlığına görə fəxri fərmanla təltif edilib.
Fəxri fərman əmək və əhalinin sosial müdafiəsi nazirinin müavini Anar Əliyevə təqdim olunub.
Həmçinin ictimaishura.az saytında keçirilən sorğuya əsasən nazirlik yanında İctimai şuranın 2023-cü il üzrə ən fəal İctimai şura seçildiyi diqqətə çatdırılıb və bununla bağlı İctimai şuranın sədri, professor Elşad Məmmədova Fəxri fərman təqdim edilib.
