Gürcüstanda deputatlar məhbuslara kütləvi amnistiya haqqında qanuna üçüncü və sonuncu oxunuşda səs veriblər. AFN.az yerli mediaya istinadən xəbər verir ki, qanunun lehinə 84 deputat səs verib. Sonra o, imzalanmaq üçün ölkə prezidenti Salome Zurabişviliyə ünvanlanacaq.Qanun layihəsinin təşəbbüskarı hakim “Gürcü Arzusu – Demokratik Gürcüstan” partiyasıdır. Layihə təsdiqlənərsə Gürcüstanda bütün məhkumların təxminən üçdə biri ya cəzalarını çəkməkdən tamamilə azad ediləcək, ya da cəzaları yarıya, dörddə birə və ya altıda birə qədər azalacaq. Partiyanın icraçı katibi Mamuka Mdinaradze bildirib ki, amnistiya 6 minə yaxın məhbusu əhatə edəcək. Bunların mindən çoxu qanun qüvvəyə mindikdən sonra azadlığa buraxılacaq, qalanlarının cəzası azaldılacaq.Amnistiya 2024-cü il iyulun 1-dək törədilmiş cinayət əməllərinə görə məhkum edilmiş şəxslərə şamil ediləcək. Qanun qatillərə, narkotik alverçilərinə və zorlayanlara, eləcə də digər ağır və xüsusilə ağır cinayətlər törətmiş şəxslərə şamil edilməyəcək.
