Beynəlxalq kredit reytinq agentliyi "Fitch Ratings" bu il qlobal iqtisadiyyat üçün artım proqnozunu 2,6 faizdən 2,7 faizə yüksəldib.
Marja xəbər verir ki, "Fitch" "Qlobal İqtisadi Proqnozlar Hesabatı"nın sentyabr buraxılışını dərc edib.
Hesabatda qeyd olunub ki, bu il dünya iqtisadiyyatının tarixi tendensiyaya uyğun olaraq 2,7 faiz artacağı gözlənilir.
Hesabatda bu göstəricinin iyun ayında proqnozlaşdırılandan 0,1 bənd yüksək olduğu, ABŞ, Böyük Britaniya, Braziliya və Rusiyanın iqitsadi artım proqnozlarının yuxarıya doğru yenidən nəzərdən keçirildiyi bildirilib.
Hesabatda, gələn il ABŞ-da iqtisadi artımın yavaşlaması ilə əlaqədar olaraq qlobal iqtisadi artımın 2025-ci ildə 2,5%, 2026-cı ildə isə 2,4%-ə enməsinin gözlənildiyi qeyd edilib.
“Fed-in yumşaq pul siyasəti dövrü nəhayət başlamaq üzrədir, lakin faiz dərəcələri gələn il məhdudlaşdırıcı olaraq qalacaq və faiz endirimlərinin iqtisadi artıma təsiri kiçik olacaq", - hesabatda bildirilir.
Bundan əlavə, hesabatda Çinin ixracının artım tempinin azalması ilə əlaqədar olaraq gələn il iqtisadi artımının yavaşlayacağı, Avrozonada isə iqtisadi artımın isə gələn il bərpa olunacağı qeyd edilib.
Hesabatda, ABŞ iqtisadiyyatı üçün artım proqnozunun bu il 2,1 faizdən 2,5 faizə yüksəldildiyi, ölkə iqtisadiyyatının 2025 və 2026-cı illərdə 1,6 faiz artacağının gözlənildiyi qeyd edilib.
Hesabatda ABŞ-da xidmət inflyasiyasının hələ də yüksək olduğu vurğulanaraq, FED-in pul siyasətinin yumşaldılması dövrünün əvvəlki faiz azaltma dövrləri ilə müqayisədə mülayim və yavaş olacağı qeyd edilib.
Hesabatda qeyd edilib ki, Çinin bu il 4,8 faiz, gələn il isə 4,5 faiz, Avro Bölgəsinin bu il 0,8 faiz, 2025-ci ildə isə 1,5 faiz böyüməsi gözlənilir.
Hesabatda ABŞ-da və bəzi inkişaf etmiş iqtisadiyyatlarda işsizliyin artdığına diqqət çəkilərək, bunun işçi qüvvəsinə tələbin azalmasından çox işçi təklifinin artmasını əks etdirdiyi qeyd edilib.
Hesabatda, son məlumatların FED-in inflyasiyanın azalma yolunda olduğuna dair inamını artırdığı vurğulanaraq, "Sentyabr və dekabr iclaslarında 0,25 faiz bəndi, 2025-ci ildə 1,25 faiz bəndi və 2026-cı ildə 0,75 faiz bənd faiz endirimi gözləyirik", deyilir.
