Ali Məhkəmədə dələduzluqda təqsirləndirilən F.Hüşənovun barəsindəki qərardan verilən kassasiya şikayətinə baxılıb.
Pravda.az-ın əldə etdiyi məlumata görə, hakim Tahir Kazımovun sədrliyi ilə keçirilən prosesdə qərar elan olunub.
Qərara əsasən, şikayət təmin edilməyib.
Xatırlatma: Bakı Ağır Cinayətlər Məhkəməsinin hökmü ilə o, Cinayət Məcəlləsinin (CM) 178.3.2-ci (külli miqdarda dələduzluq) maddəsi ilə təqsirli bilinərək 6 il 11 ay 29 gün azadlıqdan məhrum edilib. Bakı Apellyasiya Məhkəməsi isə aşağı instansiya məhkəməsinin çıxardığı hökmü dəyişdirilib. Məhkumun ittiham olunduğu əməli CM-in 178.2.4-cü (xeyli miqdarda ziyan vurmaqla törədildikdə) maddəsi ilə tövsif olunub və F.Hüşənova həmin maddə ilə 3 il həbs cəzası verilib.
İttihama görə, F.Hüşənov özgənin əmlakını ələ keçirmə məqsədi ilə tanışı, zərərçəkmiş S.Orucovun İndoneziyanın Bali adalarına 9 gün müddətinə istirahətə getdiyi üçün ona məxsus “Chevrolet Camaro” markalı avtomobilini müvəqqəti idarə etmək üçün etibarnamə istəyib. Zərərçəkmiş də onun adına mülki etibarnamə verib. F.Hüşənov 26 iyul 2019-cu il tarixdə S.Orucovla Bakı şəhəri ərazisində görüşüb, onun idarə etdiyi “Chevrolet Camaro” markalı maşını ailəsini aparmaq adı ilə götürüb. Sonra təqsirləndirilən şəxs Baş Dövlət Yol Polis İdarəsində 55000 manat dəyərində olan həmin avtomobili M.M.-nin (şərti) adına rəsmiləşdirərək onun işlətdiyi lombarda girov qoyub 16500 ABŞ dolları və 3000 manat pul götürüb.
Kamal Məmmədov
