"Zaxarovanın fikri müttəfiqlik münasibətlərimizə kölgə salacaq hərəkətdir" - Politoloq

"Rusiyanın Azərbaycanla 2022-ci ilin 22 fevralında qarşılıqlı müttəfiqlik anlaşması var. Həmin anlaşmanın şərtinə əsasən, hər iki tərəf - həm Azərbaycan, həm də Rusiya bir-birinə qarşı hər hansı bir təhdid yaradacaq hərəkətlərə yol verməməlidir. Əgər bundan sonra Rusiya Ermənistana müxtəlif formada silah-sursatın ötürülməsini həyata keçiribsə və yaxud da keçirsə, Azərbaycanın da haqqıdır ki, öz dostlarıyla, tərəfdaşlarıyla, müttəfiqləriylə bu və ya digər formada bu prosesi həyata keçirsin".

Bu sözləri Redaktor.az-a açıqlmasında politoloq Samir Hümbətov Rusiya Xarici İşlər Nazirliyinin rəsmi nümayəndəsi Mariya Zaxarovanın "Rusiya Bakının Kiyevi silahla təmin etməsi ilə bağlı məlumatları yoxlayır" fikrini şərh edərkən deyib.

Onun sözlərinə görə, Azərbaycan Ukraynanı silahlandırmır:

"Azərbaycan təqribən dörd dəfə Ukraynaya humanitar yardım göndərib. Burada generator, dərman preparatları, ərzaq, çadır var idi. Gücü çatdığı qədər, nəyə imkanı çatırsa, dövlət olaraq bu yardımı Ukraynaya edib və Prezident İlham Əliyev də həm Zelenski ilə görüşdə deyib, həm də elə xarici işlər nazirləri səviyyəsində keçirilən telefon danışıqlarında bu məsələlər müzakirə olunub. Hətta axırıncı dəfə NATO baş katibinin Azərbaycana səfərində bu məsələyə toxunuldu. Amma Azərbaycan Ukraynaya hər hansı formada silah ötürmür. Rusiyanın ola bilsin ki, hansısa formada öz ağlına gələ bilər ki, Azərbaycan bunu eləyir. Birincisi, onu yoxlamaq üçün Rusiyanın ixtiyarı yoxdur ki, hansısa formada yoxlaya. Amma hətta yoxlasa belə Azərbaycan silah ötürmür, Azərbaycan silah ötürsə, onu açıq şəkildə bildirər. Yəni burada problemli bir şey yoxdur. Hətta bəzən sosial şəbəkələr üzərində bu humanitar yardım içərisinə nələrin daxil olduğu da siyahı olaraq paylaşılmışdı. Azərbaycan ona humanitar yardım göstərib. Bu da beynəlxalq hüququn insani cəhətdən, həm də beynəlxalq humanitar yardımın norma və prinsiplərinə uyğun olduğu üçün Azərbaycan bunu həyata keçirir və bundan sonra da hesab edirəm ki, bunu həyata keçirəcək. Burada hər hansı formada qəbahət yoxdur. Rusiyaya qarşı hər hansı fikir nəzərdə tutulmur. Zaxarova anlamır ki, Azərbaycanın göndərdiyi humanitar yardımdır və onu bu gün də davam etdirir. Düşünürəm ki, Zaxarovanın fikrinin hər hansı bir nə siyasi, nə hüquqi əsası yoxdur. Əksinə, Zaxarovanın fikri müttəfiqlik münasibətlərimizə kölgə salacaq hərəkətdir".

Həmidə İBRAHİMLİ