Şeyxin qudası: "Oğlu 2 rükət namazı güclə qılır"

Xəbərin çap versiyası
Tarix: 20-09-2017, 10:42
Şeyxin qudası:


SİVİL.AZ Şeyxin qudası, son günlər oğlunun həbsi ilə bir daha mətbuatın gündəminə gələn sabiq deputat Hacı Qalib Salahzadənin "Yeni Müsavat"a müsahibəsini təqdim edir:

- Hacı, Qafqaz Müsəlmanları İdarəsinin (QMİ) Şeyxlə bağlı yazılara cavab olaraq yaydığı bəyanatı oxudunuzmu?

- Oxudum. Sizə bir söz deyim: Qafqaz Müsəlmanları İdarəsi nə deyirsə, düz deyir. Şeyx nə deyirsə, tamamilə düz deyir. Mənim heç bir əlavəm yoxdur...

- Amma bəyanatda sizə ünvanlı da gizli bir eyham var. Belə çıxır ki, sizin Şeyxlə münasibətinizdə hansısa problemlər yaranıb?

- Mənim Şeyxlə münasibətlərimdə nə problem ola bilər? Heç bir problem yoxdur (gülür). Ağsaqqaldır, belə məsləhət bilir, belə də deyir.

- Son günlərdə Şeyxlə görüşünüz, ya telefon danışığınız olubmu?

- Telefon danışığımız olub. Amma görüşümüz olmayıb.

- Dediklərinizə görə sizə iradları oldu, yəqin...

- Yox. Nə irad? Dediklərimə görə mənə heç kim irad tutmur. Belə məsləhətdir, qurtardı getdi.

- Qafqaz Müsəlmanları İdarəsinin bəyanatında Şeyxin oğlunun ölkəni birdəfəlik tərk etməsi ilə bağlı yayılan xəbərlərlə bağlı deyilir ki, “QMİ sədri və ailəsi ilə bağlı informasiyaları yalnız sədrin özü və ya oğlu, lazım bildikləri halda, gündəmə gətirmək haqqına malikdirlər. Ailədaxili məsələlərlə bağlı ailəyə yaxın digər şəxslərin məlumat yaymaq və ya hər hansı məlumatlara şərh vermək hüququ yoxdur”. Bu, sizə ünvanlanmış mesajdır...

- Şeyxin oğlunun Türkiyəyə getməsi düzdür. Amma deyir, elə-belə gedib. Mən elə bilirdim, birdəfəlik köçüb. Amma onlar deyirlər ki, yox, müvəqqəti gedib, işləri var, qayıdacaq.

- Hacı, necə bilirsiniz, Şeyxin adı niyə bu qədər geniş hallandırılır? Burada məqsəd-məram nə ola bilər?

- Onu Şeyxin özündən soruş.

- Özü ilə danışmaq imkanımız yoxdur, təəssüf ki...

- Vəssalam da.

- Qafqaz Müsəlmanları İdarəsinin bəyanatında bildirilir ki, yayılan dezinformasiyaların “erməni kəşfiyyat orqanları tərəfindən yayılması” istisna olunmur...

- Yəqin, Şeyx bir şey bilir ki, elə də deyir. Yoxsa mən Bilgəhdən qırağa çıxmıram. Nə bilim ki, nə var-nə yox. Şeyx bir şey bilir ki, belə deyir.

- Bütün bunları QMİ-nin ləğv olunması planının tərkib hissəsi sayanlar var. Eyni zamanda, Şeyxin biznesinin davasının getdiyi versiyası səslənir. Bir ehtimal da bundan ibarətdir ki, sizin “Şeyxin varisi oğludur” sözləriniz ona qarşı təzyiqləri artırıb. Bu barədə nə deyə bilərsiniz?

- Keçən dəfə jurnalist məndən soruşdu ki, Şeyxin varisi kim ola bilər? Dedim ki, mənim varisim oğlum deyil? Şeyxin də varisi oğlu olar da... Yəni Şeyxin var-dövləti oğluna qalar da. Sonra sözü fırlatdılar ki, Şeyxin varisi oğlu olacaq. Bu uşaq iki rükət namazı güclə qılır, ondan Şeyxülislam olar? Mən necə o uşağı Şeyx kimi nəzərdə tuta bilərəm? Şeyxin özündən başqa kim bilir ki, kim savadlıdır, kim savadsızdır?

- Hər halda, Şeyx istefa verməyə hazırlaşmır, eləmi?

- Şeyx cavan adamdır, nə istefa, nə bir şey! (gülür). Xahiş edirəm, bütün bunlar barədə onun özündən soruşun...

- Oğlunuzun həbsi barədə mətbuata geniş danışmısınız. Hazırda vəziyyət necədir?

- Oğlumun bir dənə təqsiri var, o da Hacı Qalibin oğlu olmağı. Vəssalam, şüttamam. Yoxsa bu adamlar bayram günü gəliblər, qapını döyüblər, pul tələb ediblər...

- Nə qədər su pulu borcu olub ki, məsələ bu qədər böyüyüb?

- Guya 69 manat su pulu borcu olub. Onu da ayda, ya ay yarımda bir dəfə qoca kişi var, pulu alır, sonra qəbzi gətirir. Bu gələnlər isə nə su pulu yığandır, nə də... Oğlanın anası çıxıb bayıra, görüb 3 nəfər qapıda dayanıb. Soruşub ki, kimsiniz? Deyiblər, biz su idarəsindənik. Deyib, axı bir kişi gəlib, su pulunu aparır. Deyiblər, bundan sonra biz pulu yığacağıq. Qayıdıb ki, ay balam, sayğac var, biz özümüz gedib ödəməliyik, siz kimsiniz? Qayıdıb ki, “ağzının danışığını bil”. Kəlmə-kəlmə deyirəm sənə... Bir sözlə, anasını təhqir edib. Oğlan da çıxıb bayıra. Müdaxilə edəndə deyiblər ki, sən kimsən? Əlini uzadıb ona sarı. Bu da bir dənə çəkib, çənəsi sınıb. Bu adamı həkimə aparıblar, əməliyyat etdiriblər. Onlar da kişi adam çıxdılar, dedilər ki, biz şikayət etmirik. Yazılı şəkildə tədqiqatçı Əziz Əzizova yazıblar ki, bizim bu adamdan şikayətimiz yoxdur. 10 gündən sonra isə prokurorluq başlayıb ki, sən vəzifə başında olan adamı vurubsan. 315.2 maddəsini veriblər. Hansı ki, dövlət qulluqçusu, ya polisə qarşı eyni hərəkət olsa, bu maddə düşürdü. Amma heç su idarəsinin rəisi də dövlət qulluqçusu deyil. Götürüb yükləyiblər buna ki, dövlət qulluqçusunu döyüb.

- Hesab olunur ki, Şeyxin Çexiyadakı biznesi ilə bağlı məlumatların yayılması, oğlunun Türkiyəyə köçməsi ilə eyni vaxtda onun qudasının oğlunun həbs olunması arasında əlaqə var. Bu cür fikirlər barədə nə deyə bilərsiniz?

- Mənim oğlumun məhkəməsi sentyabrın 13-ü, axşam saat 8-də olub.

- Bu hadisələr arasında əlaqə görürsünüzmü?

- Yox.

Sivil.az



Diqqətinizi çəkə biləcək digər xəbərlər
Baş redaktor: Samir Hüseynov
Əlaqə nömrəsi: 055 680 19 80
E-mail: sivilinfo@gmail.com

Mobil versiya
Haqqımızda \ Əlaqə
Facebook səhifəmiz
    "Kütləvi informasiya vasitələri haqqında Azərbaycan Respublikasının Qanunu"na əsasən KİV qanunla qadağan olunmuş mənbələr istisna olmaqla, istənilən vəsaitlər hesabına maliyyələşdirilə bilər (Maddə 6-1), KİV üzərində dövlət senzurasına, habelə bu məqsədlə xüsusi dövlət orqanlarının və ya vəzifələrin yaradılmasına və maliyyələşdirilməsinə yol verilmir (Maddə 7), KİV cəmiyyətdəki iqtisadi, siyasi, ictimai və sosial durum haqqında, dövlət orqanlarının, bələdiyyələrin, idarə, müəssisə və təşkilatların, ictimai birliklərin, siyasi partiyaların, vəzifəli şəxslərin fəaliyyəti barədə operativ və doğru-dürüst məlumatlar almaq hüququna malikdirlər (Maddə 8).

Copyright © 2016-2017 SiviL.az Xəbərlərdən istifadə edərkən istinad edilməsi mütləqdir. Created by BuludHost Company



 
Facebook səhifəmiz