"Hadi müəllim cəmiyyətimizin öndə gedən ziyalılarından biri idi" - AMEA Prezidenti

Bu gün səhər saatlarında ürəktutmasından vəfat edən sabiq deputat, Milli Məclisin Əmək və sosial siyasət komitəsinin keçmiş sədri Hadi Rəcəbli ilə Təzəpir məscidində vida mərasimi keçirilir. Mərasimdə mərhum siyasətçinin ailəsi, keçmiş həmkarları, yaxınları və dostları iştirak edir.

Mərasimdə iştirak edən AMEA prezidenti akademik İsa Həbibbəyli Modern.az-a açıqlamasında bildirib ki, Hadi müəllim Yeni Azərbaycan Partiyasının ən fəal üzvlərindən biri olub, təbliğat-təviqat, ideoloji işdə də yaxından iştirak edib:

"Hadi müəllim bizim ölkəmizin, cəmiyyətimizin həmişə öndə gedən ziyalılarından, deputatlarından biri idi. Eyni zamanda Milli Məclisdə komitə sədri kimi sosial sahəyə dair qanunların qəbul olunmasında da özünəməxsus xidmətləri var idi. O, ideoloji fəaliyyətlə məşğul olarkən sosial sahənin mahiyyətinə və fəlsəfəsinə dair bir sıra dərsliklər yazıb".

Sabiq deputat Hüseynbala Mirələmov isə Hadi Rəcəbli ilə dünən 3-4 dəfə telefonla danışdığını bildirib:

"Bu gün səhər mənə deyəndə, düzü, heç inanmadım, elə bildim, kiminsə zarafatıdır.T ez onun telefonuna zəng vurdum, gördüm bağlıdır. Kürəkəninə zəng etdim, ağlaya-ağlaya cavab verdi. Bildim ki, bu acı həqiqətdir. Dünən telefonda 3-4 dəfə danışmışıq. Ayın 14-də bu binada, il məclisində iştirak etmişik. Onun ölümü mənə unudulmaz yara, təcrübə yaşatdı. Heç inana bilmirəm, həyatı sevən bir insan, nikbin, dostcanlı, ən gözəl dost idi"