Azərbaycan ötən il xalis maliyyə öhdəliklərini 1 milyard dollardan çox azaldıb

2023-cü ildə Azərbaycanın xalis maliyyə öhdəlikləri 1 milyard 30,4 milyon ABŞ dolları azalıb. Halbuki, 2022-ci ildə xalis maliyyə öhdəlikləri 4 milyard 705,6 milyon ABŞ dolları azalmışdı.

"Report" bu barədə Azərbaycan Mərkəzi Bankına istinadən xəbər verir.

Ötənilki azalma Azərbaycana cəlb olunmuş birbaşa investisiyaların 6 milyard 658,1 milyon ABŞ dolları artması (1 il bundan əvvəl 6 milyard 275,8 milyon ABŞ dolları artım olub), cəlb olunmuş investisiyaların repatriasiyasının 6 milyard 876,3 milyon ABŞ dolları azalması (1 il bundan əvvəl 11 milyard 202,5 milyon ABŞ dolları azalma olub), neft bonusunun 471 milyon ABŞ dolları artması (1 il bundan əvvəl 452,2 milyon ABŞ dolları artım olub), portfel investisiyalarının 694,1 milyon ABŞ dolları azalması (1 il bundan əvvəl 634,3 milyon ABŞ dolları azalma olub), digər investisiyaların isə 589,1 milyon ABŞ dolları azalması (1 il bundan əvvəl 403,2 milyon ABŞ dolları artım olub) hesabına təmin edilib.