""Rusiya İslam Dünyası" strateji baxış qrupu Rusiya ilə İslam Əməkdaşlıq Təşkilatı arasında münasibətlərdə dəstəkləyici struktura çevrilib".
Bakıvaxtı.az "TASS"a istinadən xəbər verir ki, bunu "Rusiya - İslam Dünyası: KazanForum" beynəlxalq iqtisadi forumunda çıxış edən Tatarıstan Respublikasının Rəisi, "Rusiya İslam Dünyası" strateji baxış qrupunun sədri Rüstəm Minnixanov deyib.
Onun sözlərinə görə, sözügedən qrup Rusiya ilə İslam Əməkdaşlıq Təşkilatı arasında dostluğun, qarşılıqlı anlaşmanın və etimadın möhkəmləndirilməsi kontekstində bir alətə çevrilib.
"Strateji baxış qrupu ənənəvi mənəvi-əxlaqi dəyərlərin qorunmasına və Rus Pravoslav Kilsəsi ilə İslam dünyası arasında birbaşa dialoqa yönəlmiş qlobal səviyyədə dinlərarası dialoq üçün unikal platformadır" - deyə Tatarıstan Rəisi vurğulayıb.
Qeyd edək ki, "Rusiya-İslam Dünyası" Strateji Baxış Qrupu 2006-cı ildə Yevgeni Primakov və Mintimer Şaymiyevin rəhbərliyi ilə Rusiya ilə İslam ölkələri arasında bütün sahələrdə əməkdaşlığı genişləndirmək üçün məsləhətçi orqan kimi yaradılıb. Qrupa keçmiş yüksək vəzifəli rəhbərlər, elm və ictimaiyyət nümayəndələri, işgüzar dairələr, din xadimləri daxildir. Hazırda mayın 14-19 aralığında Kazanda "Rusiya - İslam Dünyası: KazanForum"u keçirilir.
Gülşən Şərif
