Azərbaycan mətbuatında oxucunu bizdə benzinin ucuz olması fikrini təlqin edən yazılar dərc olunur. Adətən, belə yazıların dalğası yanacağın növbəti artımından əvvəl baş verir. Oxuculara başqa ölkədə bütün məşhur markalı benzinlərin qiymətlərindən ibarət “benzin orta qiyməti” izah edilir və orta qiymət Aİ-92 markalı ucuz Azərbaycan benzininin qiyməti ilə müqayisə edilir. Bir neçə ildir ki, onun litri 1 manata satılır və növbəti yüksək keyfiyyətli benzin olan Aİ-96 Azərbaycanda iki dəfə bahadır - litri 2 manat, halbuki bu yanacaq markasının keyfiyyəti və enerji tutumu iki dəfə yaxşı deyil. Ölkəmizdə yanacaq bazarında firavanlıq illüziyası yaratmağın ən geniş yayılmış yolu azərbaycanlıların ölkədəki orta əməkhaqqı ilə əlaqəli alıcılıq qabiliyyəti meyarına məhəl qoymamaqdır. “Turan” bu məqalədə Azərbaycan da daxil, bir neçə ölkə vətəndaşlarının bir aylıq orta əməkhaqqı müqabilində Aİ-92 (müntəzəm) markalı benzin almaq imkanlarını müqayisə edəcək.
Azərbaycanda orta aylıq nominal əməkhaqqı 2024-cü il fevralın 1-nə 942,4 manat (554,3 ABŞ dolları) təşkil edib. Bu məbləğə 942 litr Aİ-92 benzini almaq olar.
Gürcüstanda orta əməkhaqqı 2044 lari və ya 761 dollardır. Bu məbləğə 760 litr “92” markalı benzin (2,65 lari və ya litri təxminən 1,02 ABŞ dolları) ala bilərsiniz.
Qazaxıstanda 2024-cü ilin birinci rübündə orta nominal əməkhaqqı 382 279 tenge, yəni 870 dollar təşkil edib. Bu məbləğə ölkədə 1 litri təxminən 200 tengeyə satılan 1911 litr 92 markalı benzin ala bilərsiniz.
Rusiyada ucuz benzin 55 rubla satılır. Rusiya Federasiyasında orta əməkhaqqı 78 min rubl təşkil edir ki, bu da 1418 litr Aİ-92 benzinini almaq üçün istifadə edilə bilər.
Amerika Federal Statistika Bürosunun məlumatına görə, 2024-cü ilin əvvəlində ABŞ-da orta əməkhaqqı saatda 28,26 dollar, yəni ayda 4521,6 dollar təşkil edib. Adi benzin 2024-cü ildə 90 sentdən 1 dollara satılır, qiymətlər müxtəlif ştatlarda dəyişir. Bu o deməkdir ki, amerikalı litri 1 dollara 4522 litr ucuz benzin ala bilər.
Almaniya vətəndaşlarının orta aylıq gəliri 5552 avro, benzinin qiyməti isə 1,8 avrodur. Bu o deməkdir ki, bir alman orta əməkhaqqı ilə 3082 litr benzin ala bilir.
Benzin/maaş nisbətinə görə, azərbaycanlılar gürcülərdən daha yaxşı yaşayırlar, lakin sadalanan ölkələrin digər vətəndaşlarından xeyli geri qalırlar.
