Dünən iki ölkənin sərhəd komissiyaları aprelin 19-da keçirilən birgə iclasda qəbul edilmiş protokola uyğun olaraq, Ermənistanın Bağanıs, Azərbaycanın Bağanıs Ayrım, Ermənistanın Voskepar, Azərbaycanın Aşağı Əskipara, Ermənistanın Kirants, Azərbaycanın Xeyrimli, Ermənistanın Berkaber və Azərbaycanın Qızılhacılı kəndləri arasında sərhəd hissələrini razılaşdırıblar.
Teleqraf.com xəbər verir ki, bunu Ermənistan Baş naziri Nikol Paşinyan bu gün, mayın 16-da hökumətin iclasında bildirib.
“Bu sərhədyanı ərazilərin təsviri protokolları imzalanıb. Baş verənləri iki səbəbdən böyük uğur hesab edirəm. Birincisi, suverenliyimiz və müstəqilliyimizin daha da inkişaf etdirilməsi və möhkəmləndirilməsi üçün çox mühüm təməl daşı qoyulub, ikincisi, müstəqillik əldə etdikdən sonra respublikamızın ilk dəfə olaraq rəsmi surətdə demarkasiya olunmuş sərhədi olur, bu da həm adıçəkilən kəndlərdə, həm də Ermənistan-Azərbaycan sərhədi boyunca təhlükəsizlik və sabitliyin səviyyəsini önəmli dərəcədə artıracaq”, - baş nazir bildirb.
Paşinyan qeyd edib ki, demarkasiya işi 1976-cı ilin xəritəsinə uyğun aparılır:
“Bu, Ermənistan və Azərbaycan arasında yeni sərhədin yaradılması prosesi deyil, Almatı bəyannaməsi ilə təsdiqlənmiş sərhədlərin yenidən çəkilməsi prosesidir. Yəni yeni sərhəd yaratmırıq, SSRİ-nin dağılması zamanı mövcud olan və de-yure hüquqi əhəmiyyət kəsb edən sərhədləri yenidən təsdiqləyirik”.
Ermənistan rəhbəri prosesdə işlədilən “yeni prinsip”dən də danışıb:
“Biz prinsip götürmüşük ki, sərhəd keçməli olduğu yerdən keçir. Bu, çox mühüm prinsipdir, çünki bu prinsipdən kənara çıxaraq yeni sərhəd xətti yaratmalı olduğumuz məntiqi ilə getsək, bu o demək olardı ki, biz daimi eskalasiya və hərbi münaqişələr mənbəyi yaradırıq. “Sərhəd keçməli olduğu yerdən keçir” dediyimiz bu prinsipimizi təsbit etməklə, eskalasiya kontekstini aradan qaldırmasaq da, mahiyyətcə, heç olmasa əhəmiyyətli dərəcədə azaltmış olduq”.
Onun sözlərinə görə, bu prinsip Ermənistanla Azərbaycan arasındakı sərhədin bütün hissələri üçün keçərlidir: “Bununla bütün delimitasiya prosesi üçün işləməli olan delimitasiya formulunu yaradırıq. Bu o deməkdir ki, delimitasiya və demarkasiya prosesi maksimum proqnozlaşdırıla bilən olur”.
