İrlandiya baş nazirinin müavini və xarici işlər naziri Maykl Martin may ayının sonuna qədər Fələstin Dövlətini rəsmən tanıyacaqlarını açıqlayıb.
Hafta.az-ın yazdığına görə, Maykl Martin, yerli radio kanalında verdiyi açıqlamada, Fələstini rəsmən tanımaq qərarlarının qəti olduğunu və ayın sonuna qədər reallaşacağını bildirib. İrlandiyanın xarici işlər naziri bu addımın regionda çoxdan gözlənilən sülhə töhfə verəcəyini vurğulayıb.
Avropa İttifaqına üzv olan İspaniya, İrlandiya, Sloveniya və Maltanın liderləri mart ayında yaydıqları birgə bəyanatda Fələstin dövlətini tanımağa razı olduqlarını açıqlamışdılar. Bu qrup Yaxın Şərqdə iki dövlətli həllin əhəmiyyətini və bu istiqamətdə atılan addımların sülhə töhfələrini tez-tez dilə gətirir.
İsrailin Qəzzaya qarşı başlatdığı əməliyyatlar beynəlxalq ictimaiyyəti narahat etməkdə davam edir. Bu vəziyyət bütün dünyada Fələstinin rəsmi tanınması çağırışlarının artmasına səbəb olur.
İrlandiyanın baş naziri Simon Harris və İspaniyanın baş naziri Pedro Sançes arasında son danışıqlar iki ölkənin bu prosesdə koordinasiyalı şəkildə hərəkət etmək əzmini nümayiş etdirir. "Biz qətiyyətimizi gücləndirmək və ən təsirli mesajı çatdırmaq üçün mümkün qədər çox ölkə ilə işləməyi planlaşdırırıq" deyib Harris.
Xarici işlər naziri Martin Fələstinlə bağlı tanınma prosesini Ərəb Sülh Təşəbbüsü və iki dövlətli həllin bir hissəsi hesab edir. “Bu gün biz Fələstin xalqının öz müqəddəratını təyinetmə hüququnu dəstəkləmək məqsədi ilə bu məsələnin yekun detalları ilə bağlı xarici işlər nazirləri ilə müzakirələr aparacağıq” deyib.
İspaniya Fələstin dövlətinin tanınması üçün diplomatik fəaliyyətlərdə aparıcı rol oynayır. Bu prosesdə İrlandiya, Sloveniya, Malta və Norveç kimi ölkələrdən də dəstək alır. İspaniyanın bu təşəbbüsü regional sabitliyin və sülhün təmin edilməsi üçün genişmiqyaslı səy kimi qiymətləndirilir.
Fələstin dövlətini tanıyan Avropa İttifaqına üzv ölkələrin sayı 8-ə çatıb. Bunlar Bolqarıstan, Polşa, Çexiya, Rumıniya, Slovakiya, Macarıstan, Kipr və İsveçdir. Bu tanınma Fələstinin beynəlxalq aləmdə daha çox qəbul edilməsinə imkan verir.
Digər tərəfdən, İsrail hökuməti Fələstinin tanınmasını sülh prosesinə mənfi təsir göstərəcək bir addım kimi xarakterizə edir. İsrail üçün bu tanınma təşəbbüsü terrorizmi mükafatlandıran və danışıqlar yolu ilə həll yolu tapmaq şansını azaldan bir addım kimi qiymətləndirilir.
