Bu gün Rusiya prezidenti Vladimir Putin hərbi dairələrin komandirləri ilə görüş keçirib.
Musavat.com Rusiya mediasına istinadən xəbər verir ki, Putin görüşdə yeni müdafiə naziri Andrey Belousovu təqdim edib və ilk dəfə olaraq müdafiə naziri dəyişikliyinə münasibət bildirib.
Rusiya liderinin sözlərinə görə, Belousovun təyinatı müdafiə və təhlükəsizlik xərclərinin artması ilə bağlıdır ki, bu da 2024-cü ildə ÜDM-in təxminən 8,7 faizini təşkil edib: “Xatırladım ki, 1980-ci illərin ortalarında Sovet İttifaqının müdafiə və təhlükəsizliyə ümumi xərcləri ÜDM-in təxminən 13 faizini təşkil edirdi. 2024-cü ildə müdafiə və təhlükəsizlik üçün ümumi xərclərimiz təxminən 8,7 faiz olacaq”.
Putin bildirib ki, Belousov bütün təhlükəsizlik blokunun və Müdafiə Nazirliyinin iqtisadiyyatını ölkənin ümumi iqtisadiyyatına necə inteqrasiya etməyi mükəmməl başa düşür: "Bunlar son dərəcə vacib şeylərdir".
Putin Müdafiə Nazirliyinin rəhbəri vəzifəsindən istefa verdikdən sonra Şoyquya müraciət edib, ölkənin Silahlı Qüvvələrinə “yeni görkəm verilməsi” istiqamətində gördüyü işlərin nəticələrinə görə təşəkkür edib: “Bu görkəm ardıcıl olaraq günün tələblərinə, müasir döyüş üsullarının tələblərinə uyğun olaraq yaradılır”.
Prezident Baş Qərargahdakı dəyişikliklərdən də danışıb, bildirib ki, Baş Qərargah rəhbərliyi olduğu kimi qalır və orada hər hansı dəyişiklik nəzərdə tutulmur. Onun sözlərinə görə, “döyüş işini təmin edən struktur”da da heç bir dəyişiklik yoxdur: “Döyüş işi blokunu hazırlamışıq. Ritmik fəaliyyət göstərir, uğurla işləyir və burada heç bir dəyişiklik gözlənilmir”.
Musavat.com
