Avropa İttifaqı müstəqilliyinin ilk illərindən Azərbaycanı dəstəkləyir.
APA xəbər verir ki, bunu 9 may - Avropa Gününə həsr olunmuş tədbirdə Aİ-nin Azərbaycandakı Nümayəndəliyinin rəhbəri Peter Mixalko deyib.
O bildirib ki, bu gün Aİ ticarət, ixrac və birbaşa xarici investisiyalar, o cümlədən iqtisadiyyatının şaxələndirilməsi üçün vacib olan qeyri-neft sənayesi sahəsində Azərbaycanın ilk iqtisadi tərəfdaşıdır. Onun sözlərinə görə, Avropa İttifaqının müxtəlif ölkələrindən 400-dən çox şirkət Azərbaycanda fəaliyyət göstərir.
"Biz hökumət, iqtisadi dairələr və ölkə üçün hörmətli tərəfdaş və təcrübə mənbəyi olan vətəndaş cəmiyyəti ilə sıx əməkdaşlıq edirik. Azərbaycanın qurumları Avropa İttifaqından ən yaxşı bilik və təcrübəni ölkəyə gətirən bir sıra Tvinninq və digər növ layihələrdən faydalanıblar. Güclü tərəfdaşlığımız onu göstərir ki, biz birlikdə çalışmaqla dünyanın ən yüksək standartlarına nail oluruq. Təhsil sahəsini buna misal çəkə bilərik. Rekord sayda tələbə həm Aİ, həm də Azərbaycanda Erasmus+ kimi mübadilə proqramlarında iştirak edir. Aİ tərəfindən dəstəklənən və Azərbaycan universitetləri tərəfindən həyata keçirilən əməliyyətli sayda layihə elm sahəsində gələcək əməkdaşlıq baxımından böyük potensial nümayiş etdirir.
Bərpa, dayanıqlıq və islahatlar üçün yenilənmiş gündəlik ortaq məqsədlərimizi dəstəkləmək üçün milyardlarla avronu səfərbər edən məqsədyönlü iqtisadi və investisiya planı ilə dəstəklənir. Mən çox şadam ki, bu yaxınlarda Avropa İnvestisiya Bankı kiçik və orta sahibkarlığa dəstək məqsədilə Bank Respublika ilə əməkdaşlıq müqaviləsi imzaladı" səfir Peter Mixalko deyib.
O qeyd edib ki, bu il Azərbaycan COP29-a ev sahibliyi edən ölkə kimi iqlim dəyişikliyi ilə mübarizədə qlobal səviyyədə əhəmiyyətli rol oynayır:
“Bu, beynəlxalq ictimaiyyətin Azərbaycana və onun yaşıl enerji sahəsindəki fəaliyyətinə göstərdiyi hörmətin bariz əlamətidir. Azərbaycan və iqlim dəyişikliyi ilə mübarizədə dünya lideri olan Aİ birlikdə bu tədbirdən istifadə edərək, planetimizin, ətraf mühitin və gələcəyimizin qayğısına daha yaxşı qala bilər. İqlimlə bağlı fəaliyyətlər üçün dünyada ən çox maliyyə vəsaiti ayıran Aİ və ona üzv dövlətlərdir.
Biz Azərbaycanın öz bərpa olunan enerji potensialını inkişaf etdirmək öhdəliyini alqışlayırıq. Bu da ölkənin istixana qazları və metan emissiyalarının azaldılması, eləcə də Aİ-yə üzv olan bir neçə ölkə ilə əməkdaşlıq edərək yaşıl enerjini planlaşdırılmış sualtı kabel vasitəsilə Avropaya ixrac etmək planının mühüm hissəsidir. 2022-ci ilin iyulunda Avropa Komissiyasının Prezidenti Von der Leyen və Prezident İlham Əliyev tərəfindən imzalanmış Anlaşma Memorandumu ilə enerji sektorundakı strateji əməkdaşlığımız təsdiqləndi".
