“Turan Tovuz” neynədi? - KÖŞƏ

Sərlövhəni görən kimi məni qınamağa tələsməyin.

Deməyin ki, “bu necə idman jurnalisti, futbol yazarıdı, turun oyunlarının nəticələrindən xəbərsizdi”. Mən Tovuz təmsilçisinin nəticələrini diqqətlə izləyirəm, oyunlarına da baxıram. Bilirəm ki, Ayxan Abbasovun çalışdırdığı komanda 34-cü turda “Araz-Naxçıvan”ı minimal hesablı məğlub etdi, qərblilərin üç oyunluq məğlubiyyət seriyası başa çatdı. Nəticə ürəkaçandı, komanda səfərdə qələbə qazanıb. “Turan Tovuz”un 6-cı pillədən yuxarı qalxa bilməyəcəyinin dəqiqləşməsinin fonunda bunu kiçik təsəlli saymaq olar. Bir halda ki, rəhbərlik özü də bu mövsüm hədəfin premyer-liqadakı yeri qorumaq olduğunu deyib, onda 6-cı, yaxud da 7-ci pilləni heç də pis nəticə saymaq olmaz.

Mənim verdiyim sual meydandakı nəticələrə yox, klubun ətrafında baş verən hadisələrə istiqamətlənib. Konkret desəm, qapıçı Kamal Bayramovun “Zirə” ilə oyundan sonra verdiyi müsahibə zamanı istifadə etdiyi ehtiyatsız kəlmələrə. Məlum məsələdi ki, azarkeşləri və klubun keçmişini hədəfə alan belə ifadələrə şəxsən mənim haqq qazandırmağım mümkün deyildi. Təəssüfümü də bildirdim, reaksiyamı gizlətmədim. Kamal bəy özü də sosial şəbəkə vasitəsiylə mənim mövqeyimə bir az kinayəli olsa belə, münasibət bildirdi. İncikliyini hiss etdirməməyə çalışsa da, başa düşdüm ki, yazdıqlarım xoşuna gəlməyib. Amma bunu da normal qarşıladım. Azərbaycan reallığıdı. Hətta ən haqsız adam belə səhvini asanlıqla boynuna almır, tənqidi xoşlamır. Bununla belə, sakit və səbrli davranışına görə Bayramova təşəkkür etməyi özümə borc bildim. Onu da hiss etdim ki, məlum müsahibədə hissə qapılmasının, ehtiyatsız ifadələrə yol verməsinin fərqindədi.

Elə Ayxan Abbasovun “Araz Naxçıvan”la oyundan sonra keçirilən mətbuat konfransında dedikləri də bu qənaətimi möhkəmləndirdi. Həmkarlarım baş məşqçidən qapıçının dediklərinə münasibət soruşublar. Ayxan bəyin də münasibəti belə olub: “Kamal kapitan kimi danışmalıydı. Onun danışmasında heç bir qəbahət yoxdu. Amma özünə də demişəm ki, bəzi mövzulardan uzaq olmaq lazım idi. Həmin mövzular qıcıq doğurur. Köhnə illərin söhbətlərinə qayıtmaq bu gün bizim mövzumuz deyil. Premyer-liqada möhkəmlənməyə, özümüzə uyğun oyun üslubu formalaşdırmağa çalışırıq. Bəzən alınır, bəzən alınmır. Alınmayanda basqılar olacaq. Kamalın bir az diqqətli danışması daha yaxşı olardı. Tövsiyələrimizi vermişik. Kamal özü də başa düşür”. Tam doğru deyib. Az öncə qeyd etdiyim kimi, hələ Ayxan Abbasov bu açıqlamanı verməzdən əvvəl mən Kamala tövsiyələrin verildiyini, onun da bunu başa düşdüyünü bilirdim. Kimsə mənə klubun daxilindən xəbər ötürməyib, sadəcə, hisslərim bunu deyirdi.

Abbasovun davranışı doğru olsa da, “Turan Tovuz” klub olaraq, bu məsələdə bir qədər düzgün davranmadı. Bütün bu müzakirələrin fonunda “Araz Naxçıvan”la oyunun afişasında Kamal Bayramovun yer alması doğru addım deyildi. Müdrik davranış o olardı ki, klub bu söz-söhbətin unudulmasına çalışsın. Lap elə Tovuz klubunun keçmişinə, eləcə də sadiq azarkeşlərə sahib çıxsın. Yüngülvari bir açıqlama ilə coşan ehtirasların üzərinə su səpsinlər. Onlar neynədi? Posterdə Kamal Bayramovun fotosundan istifadə etməklə sönməkdə olan alovun üzərinə benzin tökdülər, hər şey yenidən alovlanmağa başladı. Heç də təsadüfi deyil ki, bundan bir gün sonra elə sosial şəbəkələr vasitəsiylə açıqlama yayıldı. Həmin açıqlamanın da ilk cümləsi “Dəyərli “Turan Tovuz” azarkeşləri” idi. Yəni klub azarkeşlərə dəyər verdiyini, onlara strategiya ilə bağlı hesabat vermək həvəsini göstərməyə çalışmışdı.

Kaş ki, elə əvvəlcədən bu cür davranış sərgilənərdi, posterlə bağlı yanlışlığa yol verilməzdi. Ən yaxşısı da o olardı ki, Kamal Bayramov, ümumiyyətlə, belə danışmazdı, onda bütün bu söz-söhbət də yaranmazdı. Heç də təsadüfi deyil ki, Bayramovun atmaca qoxan məlum ifadələri ömrünü “Turan”a bağlayan şəxslərin də narazılığına səbəb olub. Bazar günü sosial şəbəkələrə göz gəzdirərkən Yaşar Sultanovun statusu gözümə dəydi. Ürək yanğısı ilə yazılan cümlələr bizi keçmişə qaytarır, “Turan”ın necə çətin günlərdə yarandığına, tovuzlular üçün ümid qaynağına çevrildiyinə toxunulurdu. Yaşar bəy statusun sonunda ad çəkməsə də, Kamal Bayramovun ünvanlanan “Turan”ın tarixində bircə dənə şübhəli oyun xatırlayıram, onda da qapıçı sən idin...” cümləsini də yazmışdı. Yaşananlar heç də xoş deyil, amma acı reallıqdı. Bütün bunların gələcəkdə təkrarlanmaması üçün isə “Turan Tovuz” rəhbərliyinin daha diqqətli davranması vacibdi. Bizdən söyləməsi.

AMAL ABUŞOV

• tags
• tags