Rusiya sülhməramlılarının Azərbaycan ərazisini tərk etməsi prosesi hazırda da davam etdirilir və yaxın vaxtlarda yekunlaşacaq.
BAKU.WS report-a istinadən xəbər verir ki, bu sözləri Müdafiə Nazirliyinin (MN) Mətbuat xidmətinin rəhbəri Anar Eyvazov Xocalı rayonunda yerləşən Rusiya sülhməramlılarının yola salınma mərasimi zamanı jurnalistlərə açıqlamasında deyib.
Onun sözlərinə görə, 2023-cü ilin sentyabrında həyata keçirilən antiterror əməliyyatından sonra Qarabağdakı sülhməramlı missiyanın fəaliyyətinə ehtiyac qalmayıb:
"Azərbaycan və Rusiya ölkənin ali rəhbərliyinin əldə etdiyi razılığa əsasən, sülhməramlı kontingentin vaxtından əvvəl fəaliyyətini dayandırmasına qərar verilib. 2020-ci il sentyabrın 27-də Ermənistan silahlı qüvvələrinin növbəti təxribatlarına cavab olaraq başlayan 44 günlük müharibə uğurlu başa çatıb. Vətən müharibəsindən sonra Azərbaycan, Rusiya və Ermənistan dövlət başçıları tərəfindən imzalanan üçtərəfli bəyanata müvafiq olaraq Azərbaycan ərazisində müvəqqəti yerləşdirilmiş Rusiya sülhməramlı kontingenti fəaliyyətə başlamışdı".
MN rəsmisi qeyd edib ki, 2023-ci ilin sentyabrın 19-20-də Azərbaycan Silahlı Qüvvələri tərəfindən həyata keçirilən uğurlu antiterror əməliyyatından sonra artıq misiyanın fəaliyyətinə böyük ehtiyac qalmayıb.
"Qərar veriləndən dərhal sonra müdafiə naziri general-polkovnik Zakir Həsənovun müvafiq göstərişinə uyğun olaraq, sülhməramlı kontingentin silah və texnikası, şəxsi heyyəti və ləvazimatlarının Azərbaycan ərazisindən çıxarılması üçün zəruri texniki və logistik dəstək göstərilib",- A.Eyvazov əlavə edib.
