Bakı, 15 may, AZƏRTAC
“Qaradağ Lökbatan”la matçı “qızıl oyun” adlandırardım”.
Bu sözləri AZƏRTAC-a açıqlamasında “Şamaxı” komandasının baş məşqçisi Ramiz Məmmədov I Liqanın 26-cı turunda səfərdə “Qaradağ Lökbatan”a qarşı keçirəcəkləri vacib oyun barədə danışarkən deyib.
O, görüşə itkisiz çıxacaqlarını bildirib: “Artıq bütün hazırlıqlarımızı bu matç üzərində qurmuşuq. Kollektivdə əhval-ruhiyyə yaxşıdır. Heç bir həyəcan yoxdur. Mövsüm ərzində digər komandalara qarşı necə oyamışıqsa, sabah da meydanda elə mübarizə aparacağıq. İnanıram ki, “Qaradağ Lökbatan”ı məğlub edərək, son turda “Araz-Saatlı” ilə görüşə motivasiyalı çıxacağıq. Premyer Liqaya vəsiqə qazanıb, Şamaxı bölgəsini sevindirmək istəyirik”.
Təcrübəli mütəxəssis komandasının Premyer Liqaya hazır olduğunu söyləyib: “Komandada istedadlı oyunçular çoxdur. Onların hər biri Premyer Liqada oyanamaq gücündədir. Futbolçularıma güvənim sonsuzudur”.
Qeyd edək ki, oyun mayın 16-da Lökbatan Olimpiya İdman Kompleksinin stadionunda baş tutacaq. Mövsümün başa çatmasına 2 tur qalmış “Qaradağ Lökbatan” 53 xalla birinci, “Şamaxı” isə 51 xalla ikinci pillədə qərarlaşıb. Reqlamentə əsasən, çempion komanda Premyer Liqaya vəsiqə qazanacaq.