"Elə bil ki, nənəmin oynaşını görürəm" -Minsk qrupu haqda
Artıq Ermənistan-Azərbaycan münaqişəsi tarixdə qalıb və Minsk qrupunun regionda fəaliyyətinə gərək yoxdur.
Belə bir məqamda yazıçı Seyran Səxavətin hələ 2012-ci ildə Minsk qrupunun yarıtmazlığından bəhs edən və onu fəaliyyətini dayandırmağa çağıran şeiri yada düşür.
Yazıçı AzVision.az -a açıqlamasında bildirib ki, şeiri 2012-ci ildə yazıb və ilk dəfə "525" - ci qəzetdə çap etdirib.
“ATƏT-in Minsk qrupunun nümayəndələri hər dəfə Azərbayacana gəlib yeyib-içib gedirdilər. Ortalıqda isə bir şey yox idi. Bu da mənə çox toxunurdu. Ona görə də “Ay siyasi qriplər ...” xitablı şeir yazdım. Onların fəaliyyətindən ən çox şikayət edən Ziyafət Əsgərov idi. Şeiri ona həsr etmişdim. Ancaq siyasətçilərdən heç biri reaksiya vermədilər”.
Yazıçı “ATƏT-in Minsk qrupu ləğv olunarsa, yeni bir şeir yazacaqsınızmı?” sualına belə cavab verib:
“ATƏT ona layiq deyil. Yazdığım bu şeir onun gedişinə də bəs edər. O vaxtlar irişə-irişə Xarici İşlər Nazirliyinin qarşısında görünürdülər. Saymazyana hərəkətlər edirdilər. Hər onları görəndə 3-4 kilo arıqlayırdım. Sınıxırdım”.
ATƏT-in Minsk qrupu Mənə elə gəlir ki, Onlardı muştuluğu Təkəmseyrək sevincin, gen şərin də. Yenə gülə-gülə Düşdülər maşından Xarici İşlər Nazirliyinin qənşərində. Dişim kəsir dodağımı Hər görəndə onları. Hər müxbir öz tuşundan Dürtüşdürür bu üçlüyə tərəf mikrofonları. ATƏT-in Minsk qrupu, ATƏT-in Minsk qripi Asqıra-asqıra gəzirlər dünyanı Qarabağ eşqinə. Nə deyəsən bunların Bu bisəvat, bu dişsiz iyirmi illik məşqinə. Qapı da qalmayıb, Hamısından çıxıblar, Hamısından giriblər- Bu siyasi qriplər. Ortada fındıq Biz də belə yandıq. Hey dedilər gedirlər-gəlirlər Bu siyasi əlillər. Özü də hey gülürlər. Onların tutduğu yol Hara gedir, nə yoldu? Onlar gülmür, irişir, Nə bilim vallah, Deyiblər irişmək də bir protokoldu ATƏT-in Minsk qrupu əvvəl güldü, sonra irişdi Dedik yəqin bu da bir işdi. Bu gün isə nə gülür, nə irişir, Hırıldayır. Fələk də bir az o tərəfdən Saydığını sayır, Bu da siyasətdə bir çayır. Onların getdiyi yol hırtıldayır. Yolun üstündəki kol hırtıldayır Sağ hırtıldayır, sol hırtıldayır Deyirik hər nədirsə Sağdı, soldu, yoldu, koldu Yəqin bu da bir protokoldu Yayın cırhacırında elə bil şaxtadı, sazaqdı. Sülhə gedən yol budursa Eh! nə yaman uzaqdı Nə alın açıq, nə də üz ağdı... Ey! Minski qrupu Könlüm qubar-qubardı, Səbrim qabar-qabardı. Könlümdəki qubarın Səbrimdəki qabarın Tumurcuğu saraldı. Sənə kim deyibdi ki Azərbaycan xalqının Səbri, səbir kasası Neçə milyon bareldi Niyə gözün bərəldi Siyasi istedadın Niyə belə çərəldi Hər gün tezdən duranda Gözlərimdə saralmış Acını görürəm. Özümü ölən görəndə Sizi gülən görəndə Elə bil ki, nənəmin Oynaşını görürəm.