ABŞ Federal Ehtiyat Sisteminin (FED) Nyu-York şöbəsi tərəfindən hazırlanan 2024-cü ilin birinci rübü üzrə Ev Təsərrüfatlarının Borcu və Kredit Hesabatı dərc edilib.
Marja xəbər verir ki, amerikalıların ev təsərrüfatlarının ümumi borcu 2024-cü ilin birinci rübündə əvvəlki rüblə müqayisədə 1,1% artaraq 17,69 trilyon dollara çatıb.
İlin ilk rübündə əvvəlki rüblə müqayisədə 184 milyard dollar artan ev təsərrüfatlarının borcu, illik müqayisədə 640 milyard dollar artıb.
Ən böyük borc ipoteka kreditləridir
Mənzil kreditləri amerikalıların borclarının ən yüksək hissəsini təşkil etməyə davam edir. Bu borc birinci rübdə 12,44 trilyon dollara yüksəlib.
İlin ilk rübündə əvvəlki rüblə müqayisədə 190 milyard dollar artan mənzil krediti borcu, illik müqayisədə 398 milyard dollar artıb.
Amerikalıların bu dövrdə ən çox borc götürdüyü digər öhdəliklər 1,61 trilyon dollarla avtomobil kreditləri, 1,59 trilyon dollarla tələbə kreditləri və 1,12 trilyon dollarlıq kredit kartları olub.
Sözügedən dövrdə kredit kartı borcları 14 milyard dollar, tələbə krediti borcları isə 6 milyard dollar azalıb. Eyni dövrdə avtomobil kreditlərindən yaranan borclar 9 milyard dollar artıb.
