“Birbaşa Bakı”nın minifutbolçusu Təmkin Xəlilzadənin İdman.bizə müsahibəsi
- 2023/24 mövsümünün finalında “Aznur”a 5:2 qalib gələrək, “Birbaşa Bakı” ilə ilk dəfə Minifutbol Liqasının qalibi oldun. Təəssüratların necədir?
- Çox xoşbəxtəm. 9-10 aylıq əziyyətimizin bəhrəsini gördük. Qələbədə az da olsa pay sahibi olduğuma görə ikitərəfli xoşbəxtəm. Layiq olduğumuz kuboku qazandıq. Hisslərim o qədər çoxdur ki, həyəcandan ifadə edə bilmirəm. Qələbənin dadını çıxarmaq istəyirəm.
- Finalda sanki asan qələbə qazandız...
- Yox, belə deməzdim. “Aznur” bu çempionatda iddialı komandalardan idi. Əsas rəqiblərimizdən “Zirə”ni 2 oyunda top buraxmadan yolundan uzaqlaşdırmışdı. Ona görə oyuna çox ciddi yanaşmışdıq. Hətta 1-ci qolu da onlar vurdular. Lakin daha sonra özümüzdə güc tapıb oyunu öz xeyrimizə çevirdik. Çətin matç oldu. Qıraqdan asan görünə bilər.
- Yaxşı formada olduğun görünür. Böyük futbola qayıtmaq barədə düşünürsən?
- Əlbəttə, istəyirəm. Təmkin Xəlilzadə böyük futbolla vidalaşmayıb. Təmkinə təklif olarsa, oturub danışa bilərik. Hər zaman təklif gözləyirəm.
- Onda təkliflər yoxdur?
- Yox, təkliflər oldu. Son 4-5 aya kimi bu davam etdi. Amma son aylarda hələlik olmayıb. Mövsüm bitdikdən sonra bəlkə gələr.
- Bəs Liqanın fərqi var?
- Oynayacağım liqanın fərqi var. I və II Liqalardan günü bu gün də təkliflər gəlir. Amma özüm istəmirəm.
Emin Ağa
İdman.biz
