Təcrübəyə əsasən, digər ölkələrdə avtobuslar üçün yaradılan zolaqlardan taksilər də istifadə edirlər. Çünki taksi də ictimai xidmət sahəsi hesab edilir və bunun üçün paytaxtın bəzi küçə və prospektində olan xüsusi zolaqlardan onların da istifadəsi mümkündür. Bəs taksilər üçün nəzərdə tutulmuş bu dünya təcrübəsindən Azərbaycanda da tətbiq oluna bilərmi?
Nəqliyyat məsələləri üzrə ekspert Yasin Mustafayev “Operativ Media”ya açıqlamasında bildirib ki, çəkilmiş zolaqlar avtobuslarla yanaşı xüsusi nəqliyyat vasitələrinin istifadəsi üçün nəzərdə tutulub:
“Məsələ ondan ibarətdir ki, bu ayrılmış zolaqlar sadəcə ictimai nəqliyyat və eyni zamanda operativ nəqliyyat vasitələri üçündür. Operativ nəqliyyat vaitəsi dedikdə, əməliyyatlar keçirən polislər, eyni zamanda yanğınsöndürən, həmçinin təcili yardım, tibbi avtomobillər nəzərdə tutulur. Təbii ki, bunların da xüsusi yolunun olması ən azı ictimai nəqliyyat qədər vacibdir. Yanğınsöndürən maşın yanğın söndürməyə gedir, amma yol yoxdur, həmçinin təcili tibbi yardım xəstə yanına gedir, ancaq dəfələrlə görürük ki, maşını tıxacda qalıb”.
Ekspertin sözlərinə görə, mövcud vəziyyətdə nəzərdə tutulmuş zolaqlardan taksi və digər nəqliyyat vasitələrinin istifadə etməsi mümkün deyil:
"Digər nəqliyyat vasitələrinin bu zolağa çıxması doğru deyil, bu zolaqlara sadəcə müəyyən edilmiş ictimai nəqliyyat çıxa bilər. Məsələn, avtobus müəyyən marşrut üzrə hərəkət edir deyə ora çıxa bilər. Amma başqa bir avtobusun heç marşrutu ora çıxa bilməz. Bu, dünya təcrübəsində də belədir, bütün qaydalarda da bu formadadır. Taksilərin o zolaqdan istifadə edilməsi isə yol verilməzdir. Çünki belə olan halda Bakıda hal-hazırda 70 min taksi var, bütün taksilər həmin yola doluşacaq. Bu zolaqdan operativ nəqliyyat vasitələri və eyni zamanda ictimai nəqliyyat vasitələri istifadə edə bilər”.
