Rusiyada 72 yaşlı təqaüdçü fırıldaqçıların qurbanı olub. Belə ki, Altay diyarından olan yaşlı kişi fırıldaqçılarla danışdıqdan sonra banka hücüm edib.
Publika.az xəbər verir ki, bu barədə Rusiya Daxili İşlər Nazirliyi əməliyyat videosunu təqdim edib.
Kadrlarda fırıldaqçıların göstərişi ilə hərəkət edən bir nəfərin əlində pnevmatik tapança ilə bank binasının içərisində dayanaraq telefon kamerası vasitəsilə baş verənləri yayımladığı görünür. Bir müddət sonra o, cinayət yerindən yoxa çıxır.
Nazirliyin məlumatına görə, fırıldaqçılar təqaüdçü ilə əlaqə saxlayaraq ondan “seyf hesaba” 3,3 milyon rubldan çox pul köçürməsini istəyiblər. Pulu aldıqdan sonra qurbanı Rubtsovskdakı banklardan birinin filialının məxfi məlumatların ticarətində iştirak etdiyi iddia edilən nümayəndələrinə qarşı linç etməyə inandırıblar.
Fırıldaqçıların tapşırığı ilə həmin şəxs tapança ilə silahlanıb banka gələrək onlayn yayımı işə salaraq bir növ “təzminat” olaraq işçilərdən 500 min rubl tələb edib. Yaşlı kişi mütəxəssisləri qorxutmaq üçün iki dəfə atəş açıb, binada siqnalizasiya işə düşəndə isə qaçıb.
O, tezliklə saxlanılaraq nəzarətə götürülüb. Faktla bağlı Rusiya Federasiyası Cinayət Məcəlləsinin 162-ci maddəsinin 3-cü hissəsi (“Soyğunçuluq”) ilə cinayət işi başlanıb. Təqaüdçünün pulunun oğurlanması ilə bağlı istintaq davam edir.