Xəbər verildiyi kimi, Baş nazir Əli Əsədovun qardaş Türkiyəyə səfəri çərçivəsində mayın 8-də Ankara şəhərində Azərbaycan–Türkiyə Biznes Forumu keçirilib.
Tədbirin açılış mərasimində çıxış edən Baş nazir Əli Əsədov Azərbaycanla Türkiyənin dostluğu və qardaşlığı sayəsində birgə həyata keçirilən layihələrin regionun inkişafında və Avropa ilə Asiya arasında enerji və kommunikasiya dəhlizinin yaradılmasında böyük rol oynadığını diqqətə çatdırıb. Bakı–Tbilisi–Ceyhan, Bakı–Tbilisi–Ərzurum boru kəmərləri, TANAP, Bakı–Tbilisi–Qars layihələrinin Türkiyə ilə Azərbaycanın birgə uğurlu fəaliyyətinin nəticəsi kimi dəyərləndirən Baş nazirin sözlərinə görə, mayın 25-də açılacaq Bakı-Tbilisi-Qars dəmir yolunda yükdaşımaların həcmi artırılacaq.
Qeyd olunub ki, ikitərəfli formatda həyata keçirilən layihələrə qarşılıqlı olaraq milyardlarla dollar həcmində sərmayələr qoyulub. “Bu gün biz münasibətlərimizə uzunmüddətli və strateji yanaşmalarla baxırıq. Həm Azərbaycan, həm də Türkiyə hökumətləri bütün sahələrdə əməkdaşlıq üçün birgə fəaliyyətlərə hazırdırlar”, – deyə o əlavə edib.
Baş nazir son 20 ildə Azərbaycan iqtisadiyyatına 310 milyard ABŞ dolları sərmaye qoyulduğunu, bunun da 200 milyard dollarının qeyri-neft sektronun payına düşdüyünü diqqətə çatdırıb. Azərbaycanda cəlbedici investisiya mühitinin formalaşdırıldığını bildirən Baş nazir deyib ki, ölkəmizdə xarici investorların maraqları, qoyulan vəsaitlər dövlət tərəfindən qorunur. Türkiyə şirkətlərinin də ölkəmizdə yaradılmış əlverişli biznes mühtindən faydalandığını vurğulayan Baş nazir deyib ki, hazırda Azərbaycanda 4 mindən çox Türkiyə şirkəti aktiv şəkildə fəaliyyət göstərir.
Qeyd olunub ki, Azərbaycanın işğaldan azad olunmuş ərazilərində Türkiyə şirkətləri də yaxından iştirak edirlər. Hazırda qardaş ölkənin 20-dən çox şirkətinin həmin ərazilərdə 50-yə yaxın layihə icra etdiyini bildirən Əli Əsədovun sözlərinə görə, həmin layihələrin ümumi dəyəri 4 milyard ABŞ dolları təşkil edir. “Eyni zamanda, Türkiyədə Azərbaycan şirkətləri müxtəlif sahələrdə iş qurub və qardaş ölkənin iqtisadiyyatına öz töhfəsini verib”, – deyə Baş nazir bildirib.
İki ölkə arasında qarşılıqlı investisiyaların həcminin artmaqda davam etdiyini diqqətə çatdıran hökumət rəhbəri deyib ki, Türkiyə indiyədək Azərbaycana 16 milyard ABŞ dollardan artıq sərmayə yatırıb. Öz Azərbaycanın qardaş ölkəyə qoyduğu sərmayenin həcmi isə 20 milyard ABŞ dollarından artıq olub.
Türkiyənin vitse-prezidenti Cevdet Yılmaz biznes forumunda çıxışı zamanı ölkələrimiz arasında sərbəst ticarətin təmin edilməsi istiqamətində həyata keçirilən tədbirlərdən bəhs edib. İki ölkə arasında güzəştli ticarətlə bərabər sərbəst ticarətin təmin edilməsi məqsədilə müzakirələr aparıldığını bildirən C.Yılmaz hazırda Türkiyədə 3 minə yaxın Azərbaycan şirkətinin fəaliyyət göstərdiyini diqqətə çatdırıb. Eyni zamanda, bildirilib ki, Türkiyənin podratçı şirkətləri ölkəmizin işğaldan azad edilmiş əraziləri də daxil olmaqla indiyədək 19,3 milyard ABŞ dolları dəyərində 526 layihəni öz üzərinə götürüb. “Hansı ölkədə olmasından asılı olmayaraq podratçı şirkətlərimizin bu işlərin öhdəsindən gələcəyinə inanırıq. İşğaldan azad edilən ərazilərin yenidən qurulmasında türk özəl sektorunun kənd təsərrüfatından turizmə qədər önəmli rol oynayacağına inanırıq”, – deyə vitse-prezident əlavə edib.
Yeri gəlmişkən, Azərbaycanla Türkiyə hökuməti arasında imzalanan Preferensial Ticarət Sazişinə əsasən, iki ölkə ərazisində fəaliyyət göstərən sahibkarlıq subyektləri 2021-ci ilin mart ayının 1-dən illik tarif kvotası çərçivəsində müəyyən olunmuş mallar üzrə güzəştlərdən yararlanmaq imkanı qazanıb.
Forumda, həmçinin Azərbaycan ilə Türkiyə arasında iqtisadi əməkdaşlıq üzrə Birgə Hökumətlərarası Komissiyanın 11-ci iclasında müzakirə olunan məsələlər, qəbul edilən sənədlərin əhəmiyyəti barədə ətraflı söhbət açılıb. Türkiyənin vitse-prezidenti komissiyanın iclasında qəbul olunmuş 120 maddəlik fəaliyyət planının iki ölkənin iş adamları arasında əməkdaşlığı, ticarəti genişləndirəcəyinə ümid etdiyini vurğulayıb. Hökumətlərarası komissiyanın iclasında ölkələrimiz arasında ticarəti asanlaşdırmaqdan ötrü gömrük və logistika fəaliyyətlərini sadələşdirmək üçün razılıq əldə edildiyini diqqətə çatdıran C.Yılmaz deyib ki, ən qısa zamanda sadələşdirilmiş gömrük əlaqələri üçün səylər gücləndiriləcək.
Ölkəmizin qeyri-neft sektorunun inkişafına verdiyi önəmi təqdir edən vitse-prezident deyib ki, Azərbaycan sahib olduğu təbii sərvətləri dəyərləndirir, buradan əldə etdiyi maliyyə imkanlarını qeyri-neft sektorunun genişləndirilməsinə sərf edir. O, Azərbaycan iqtisadiyyatının şaxələndirilməsində özəl sektorun müsbət rol oynayacağına, Türkiyə və Azərbaycan arasındakı qarşılıqlı əlaqələrin bölgəmizə və Türk dünyasına da nümunə olacağına, eləcə də Cənubi Qafqazda sülhün bərpasında birgə fəaliyyətin regional rifahın artacağına ümidvar olduğunu bildirib.
Tədbirdə Azərbaycanda və Türkiyədə mövcud olan biznes və investisiya mühiti barədə məlumat verilib, iki ölkənin hökumətlərinin bundan sonra da biznes dairələri arasında dialoqun təşviqinə dəstək vermək əzmində olduqları bildirilib.
Forumda Türkiyə Palatalar və Birjalar Birliyinin sədri Rifat Hisarcıklıoğlu, Azərbaycan Respublikasının İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev, Kiçik və Orta Biznesin İnkişafı Agentliyinin (KOBİA) idarə heyətinin sədri Orxan Məmmədov çıxış ediblər. Biznes Forum çərçivəsində, həmçinin Azərbaycan və Türkiyənin iş adamları arasında ikitərəfli görüşlər də keçirilib.
Eyni zamanda, Azərbaycan Türkiyə ilə kiçik və orta biznesin (KOB) sahəsində əməkdaşlığın genişləndirilməsinə dair 2 anlaşma memorandumu imzalanıb. Azərbaycanın İqtisadiyyat Nazirliyinin tabeliyində Kiçik və Orta Biznesin İnkişafı Agentliyi (KOBİA) və Türkiyənin Xarici İqtisadi Əlaqələr Komitəsinin (DEİK) nəzdində Türkiyə–Azərbaycan Biznes Şurası arasında əməkdaşlığı nəzərdə tutan anlaşma memorandumu iki ölkə arasında idxal və ixracın inkişafı ilə bağlı qarşılıqlı məlumat mübadiləsi, investisiya və sənaye layihələri barədə işgüzar dairələrin məlumatlandırılması sahəsində əməkdaşlıq, birgə tədbirlərin təşkili kimi məsələləri özündə əks etdirir.
Digər sənəd isə İslam Ölkələri üzrə Statistik, İqtisadi, Sosial Araşdırmalar və Təlim Mərkəzi (SESRİC) arasında imzalanıb. Həmin sənəddə tərəflər arasında əməkdaşlığın gücləndirilməsi, hər iki ölkənin KOB sahəsində əlaqələrinin inkişafı üçün müvafiq tədbirlərin, o cümlədən məlumat və təcrübə mübadiləsinin, sahibkarlıq sahəsində təlim proqramlarının reallaşdırılması, birgə layihələrin icrası kimi məsələlər nəzərdə tutulur.
M.YAQUBZADƏ
XQ
