Hakimin səhhəti pisləşdi: Fazil Mustaya sui-qəsddə ittiham olunanların məhkəməsi baş tutmadı

Bakı Ağır Cinayətlər Məhkəməsinin hakimi Kamran Muxtarovun səhhəti pisləşib.

Teleqraf.com xəbər verir ki, onun olduğu ünvana dərhal təcili tibbi yardım çağırılıb. O, hazırda müayinə olunur.

Qeyd edək ki, bu səbəbdən Milli Məclisin deputatı Fazil Mustaya sui-qəsddə ittiham olunan şəxslərin məhkəməsi baş tutmayıb.

Kamran Muxtarov bu işə baxan hakimlər heyətinin tərkibində yer alır.

Prosesə sədrlik edən hakim Elnur Nuruyev bildirib ki, bu günə təyin olunan proses hakimlərdən birinin səhhətində yaranan problemə görə keçirilməyəcək. O, növbəti iclasın mayın 17-də baş tutacağını deyib.

Xatırladaq ki, ötən ilin martın 28-də Milli Məclisinin deputatı Fazil Mustafaya qarşı yaşadığı evin qarşısında “Kalaşnikov” konstruksiyalı avtomat silahından atəş açılaraq terror aktı törətməkdə təqsirli bilinən Emin Əliyarov, Rəşad Əhmədov, Azər Səricanov, Elşad Əsgərov, Səbuhi Şirinovun cinayət işinə Bakı Ağır Cinayətlər Məhkəməsində hakim Elnur Nuriyevin sədrlik etdiyi kollegiyada baxılır.

Qeyd edək ki, hadisə ötən ilin martın 28-də baş verib. Milli Məclisinin deputatı Mustafa Fazil Qəzənfər oğluna yaşadığı evin qarşısında “Kalaşnikov” konstruksiyalı avtomat silahından atəş açılaraq terror aktı törədilib.
Faktla bağlı Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə), 228.2.1 (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) və digər maddələri ilə cinayət işi başlanılıb.

Daxili İşlər Nazirliyinin və Dövlət Təhlükəsizliyi Xidmətinin əməkdaşlarının birgə keçirdiyi əməliyyat-axtarış tədbirləri nəticəsində terror aktını törətməkdə şübhəli bilinən şəxslər tutularaq istintaqa təhvil verilib.
Dövlət Təhlükəsizliyi Xidmətində aparılan cinayət işi üzrə Emin Əliyarov, Rəşad Əhmədov, Azər Sərucanov, Elşad Əsgərov, Səbuhi Şirinovun barəsində ittiham elan edilib.